Hewlêr – Niştîman Kemal dîyar kerd ke seba awankerdişê yewîya neteweyî ganî heme partîyê kurdan fek sloganan ra veradê û nêvurnê waştişanê xo ser o. Niştîman Kemal her wext bale ante rolê cinîyan ê aktîf ser o û vat: “Nê warî de, rolo tewr muhîm û aktîf keweno milê cinîyan ser o.”
Platformê Yewîya Cinîyanê Kurd ra Sekreteryaya Başûrî ra Niştîman Kemal, derheqê rolê cinîyan ê warê sîyasî de, problemê yewîya neteweyî û qanûnanê Başûrê Kurdîstanî de fikrê xo pare kerdî. Niştîman Kemal dîyar kerd ke seba awankerdişê yewîya neteweyî ganî heme partîyê kurdan fek sloganan ra veradê û nêçarnê waştişanê xo ser o. Niştîman Kemal eynê wextî bale ante rolê cinîyan ê aktîf ser o û vat: “Nê warî de, rolo tewr muhîm û aktîf keweno milê cinîyan ser o. Cinî keyeyê xo de dest pêkena, komelî vurnena û bingeyê aştî bi destê xo erzena.”
‘Xebatê cinîyan resayî sewîyeyêka sîyasî û merkezî’
Niştîman Kemal îfade kerd ke Başûrê Kurdîstanî de xebatê cinîyan hîna zêde warê qanûnî û medenî de yenê ramitene û vat: “Seba ke ma heqanê cinîyan bigîrê, badê Serewedaritişê Kurdîstanî hewce bi ke ma qanûnan bivurnê. Helbet tena vurnayîşê qanûnan ney, eynî wextî de hewce bi ke ma komel û heme kesan zî beşdarê nê vurnayîşî bikerê. Badê vîyartişê wextî, ewro ma vînenê ke xebatê cinîyan resayî sewîyeyêka parlamenterî, merkezî û sîyasî. Nê vurnayîşanê muhîman ra yew, mîyanê parlamentoyî de estbîyayîşê cinîyan bi. Eynî wextî de wexto ke Başûrê Kurdîstanî de weçînayîşî benê, heme aktîvîst û parlamenterê cinî cehd kenê ke cinî merhelaya qerardayîşî de zî ca bigîrêke wezîrê cinî bibê û wezaretan de temsîlîyetê cinîyan bibo. Nê deman de cinî zîyaretê komel û hetanê sîyasî yê partîyan kenê ke no taleb bêro caardene. Kabîneyanê ma de tewr peynî di wezîrê cinî bîyî, la cehd û xebatê ma dewam kenê ke na hûmare zêdeyêr biba.”
‘Kêmaneyê ziwanê Kurdkî rapor kerdî’
Niştîman Kemal dîyar kerd ke ê sey komele hem derheqê meseleya neteweyî hem zî derheqê problemanê cinîyan de xebitîyenê û probleman bi hewayêko merkezî çareser kenê. Niştîman Kemal bi nê fikran qiseykerdişê xo wina domna: “Ma sey komele konferans û komxebatan saz kenê. Ma derheqê problemanê cinîyan û dadgehan de konferansêk viraşt ke problemê cinîyan uca de senî yenê çareserkerdene. Konferansê ma yo peyêne de zî derheqê ziwanê Kurdkî bîye ke ma Akademîya Kurdkî pîya amade kerd. Ma encamname û raporêk pêşkêşê Wezaretê Perwerdeyî kerd ke kêmaneyan ser o vinderê û nê warî de gaman bierzê.”
‘Problemê Îraqî bîyî astengî’
Niştîman Kemal derheqê meseleya neteweyî ser o wina vat: “Ma Başûrê Kurdîstanî de beşdarê Kongreya Neteweyî ya her çar parçeyan a yewine û dîyine bîyî. Seba viraştişê Kongreya Hîreyine ya her çar parçeyanê Kurdîstanî amadekarî û coşêko pîl est bi. Qerar amebi dayene ke na kongre Rojavayê Kurdîstanî de biba la wexto ke wextê kongre ame, rewşa Rojava zaf xirab bîye; xeylê têmîyanî est bî û seba naye ma nêeşkayî kongre uca de virazê. Dima qerar ame girewtene ke reyna Başûrê Kurdîstanî de bêra viraştene la seke yeno zanayene, başûr de hem şer û têmîyanîya zereyî hem zî teda û têmîyanîya derûdorî est bî, bi taybetî hetê Hukmatê Îraqî ra, bi asteng ke ma tîya de zî virazê. Nê çend serrê peyênî ke Hukmatê Îraqî wazeno Hukmatê Kurdîstanî zeîf bikero. Her çend ewro Hukmatê Kurdîstanî wayîrê îradeyê xo bibo zî, problemê ma yê xorînî Hukmatê Îraqî reyde est ê; çunke ê wazenê tim sey serdestî têbigêrê û wina zî kenê. Problemê ma yê ekonomîk û zereyî zî pêser o zêde bîyî. Rîyê nê sebeban ra heta nika ma nêeşkayî ke Kongreya Hîreyine ya Cinîyan a Neteweyî virazê. Nika Platformê Pêroyî yê Cinîyan ê Neteweyî yê Kurdan û Platformê Başûrî est o û ê hêvî kenê ke wexto ke rewş tayê aram biba, verê konferansê xo ya Başûrî virazê ke seba kongreya pîle amade bibê.”
‘Ganî heme kurdî fek sloganan ra veradê’
Niştîman Kemal seba awankerdişê yewîye veng da partîyan û vat: “Seba yewîye, çîyo tewr muhîm o yo ke ganî heme kurdî fek sloganan ra veradê. Her çar parçeyanê Kurdîstanî de, her partîyêk sloganêk afernaya û vengdayîşanê cîya-cîyayan kenê. Eke ê fek nînan ra veradê û înan pratîk de bi ca bîyarê, ez bawer kena ke problemê miletê ma do kêmî bibê. Partîyê kurdan behsê pîyayîye kenê la çi heyf ke pîya nêbenê. Her yew xo yê bînî ra girdêr û pêtêr vîneno ke no zî problemê şarê ma yo tewr gird o. Hewce yo ke nê partîyê sîyasî, verê her çî her çar parçeyanê Kurdîstanî de yewîye qebul bikerê; na gama yewin a. Gama dîyine; ganî fek xogirdvînayîşî ra veradê, çunke no nêzdîbîyayîş beno asteng ke partîyê bînî qebul bikerê. Nika her çar parçeyanê Kurdîstanî de tu hêzêko winasîn çin o ke her çar parçeyan de sey hêzêko hempar bêro qebulkerdene; çunke her parçeyêk bi sereyê xo wayîrê problem û ferqanê taybetîyan o.”
‘Şertê her parçeyî cîya yê’
Niştîman Kemal dîyar kerd ke rewşe û problemê her parçeyan yewbînan ra cîya yê û nimûne da: “ Vakur de xebatê parlamenterî û qanûnî ewil ê. Nika prosesêkê aştî rojev de yo û DEM Partî sey hêzêko sereke yê bi nameyê kurdan, seba caardişê nê prosesî Hukmatê Tirkîya reyde têkilî de ya. Eynî wextî de DEM Partî heme şaristanê Vakur û Tirkîya de beşdarê weçînayîşan bena û netîce de gelek parlamenteran erşawena Meclîsî. Rojava de badê şer û têmîyankewtişanê giranan, ewro merheleyêka newîye û cîya dest pêkerd. Seba ney, ne mumkin o ne zî raşt o ke heme parçeyê Kurdîstanî bi yew stratejî têbigêrê. Rojhelatî de zî mîyanê şarî de potansîyel û hêzêko pîl est o ke tesîrê Hukmatê Îslamî bikero la reyna zî uca de mercê têkoşînî roje bi roje giranêr û zehmetêr benê. Her çend ke tepş û metodê ma yê sîyasî goreyê parçeyan cîya bibê zî, ma heme kurd ê; coka ganî ma xebatanê xo bi na zîhnîyetê neteweyî û bi hîsê yewîya miletê xo bikerê. Seba ney, piştî û hemkarîya ma seba ferzkerdişêko dogmatîk nîyo, talebêko xorîn ê neteweyî yo. Tu partî yan polîtîkayêk na yewîye sey ferzêko se ra se parçeyanê bînan ser o ferz nêkena. Başûr de, ma nê babetan xeylê reyî erjnenê, rexneyanê xo anê ziwan û fikranê xo derûdorê xo reyde pare kenê. Hewce yo ke ma bizanê; her çend başûr biqewet bo, seba parçeyanê bînan zî hende beno piştîdayox û çimeyê moralî. Her çend problemê zereyî yê başûrî bibê zî, ganî na raştîye nêra xovîrrakerdene ke Hukmatê Kurdîstanî destkewteyêko tarîxî yo ke binê serdestîya Îraqî xelas bîyo. Çi partî û rêxistin bo, ganî nê statuyî bipawo û tim piştî bido herême.”
‘Rolo tewr muhîm mewqeyê cinîyan de yo’
Niştîman Kemal peynîya qiseykerdişê xo de bal ant ser o rolê cinîyan û bi nê vateyan vengdayîş kerd: “Nê warî de, rolo tewr muhîm û aktîf keweno milê cinîyan ser o. Cinî keyeyê xo de dest pêkena, komelî vurnena û bingeyê aştî bi destê xo erzena. Seba ke cuya ma asayî, adil û aştîyane biba, ganî heme waranê cuye de û bi taybetî zî warê sîyasî de ca bidê cinîyan. Wezîfeyê ma yo ke ma piştîya nê cinîyanê parlamenteran û aktîvîstan bikerê. Ma nê destkewteyî bi asanî nêgirewtî, coka nêbeno ke ma înan bi asanî vîndî bikerê. Eke ma bi nê zîhnîyetî têbigêrê, serkewtiş û piştîya ma ya seba yewbînan do tim dewam bikera.”
