Dayîk Şenay Malkoç û Cevahîr Altunok Cemxaneyê Erîklî Babayî de nêbîyayişê dayîkan rixne kerdê û vatê ke zayendîya pîrîyî çîn o, ganî dayîk û bawkalê pîya rayîro hembarî ra xizmet bikerê
Zaf hûmarî de pîr û endamê ocaxî Dergahê Erîklî Babayî de seba problemê komelî yê Elewîya ser kombîyayişêk kerdê. Kombîyayiş de rojdemêk ser demê cemî de cinî û mêrde cîya bi cîya ronişê, wa pîya cem nêkerê bî.
Ewlada Ocaxa Şih Çoban û Ocaxa Seyît Dervîş Cemalî Cevahîr Altunok û ewlada Ocaxa Kureyşanî Şenay Malkoçe verba cinîyan zîhnîyetê bawkalan ser o Ajansê PÎRHAyî ra qise kerdê.
Gerê kombîyayiş de cinî bibê
Ewlada Ocaxa Şih Çoban û Ocaxa Seyît Dervîş Cemalî Cevahîr Altunok Elewîya de têgeha canî esta, no ser ganî kombîyayiş de cana cinî zî bibînê û vat ke: “Rêxistin bi dayîke, yanî cinî destpê keno. Sey vatişê Pîr Hasan Efendîyî; dayîk rayîr a. No ser zî ganî kombîyayiş de cinî zî bibînê û teraqê xo înan reyde bar bikerdînê. Seba ey ma mîyanê xizmetî de yê. Heyetê Bawerî yê Ewroyî de sifte qet dayîk çinêbî la nika 5-6 hebê dayîk estê. Rayîr bi dayîke şona.”
Ewlada Ocaxê Kureyşanî Şenay Malkoç ard ziwan ke ganî cinîyan bi aktîfî xizmetê rayîrê heqî bikerê û cinîyê elewîya rêxistinê sazîyan de ca bigê û wina dewam kerd: “Nê sîlayîya dayîkan kêmanîyêk a, Tirkîya de dayîkêk xizmet kena esta? Yew dayîk zî ewlada ocaxî ya. Ma bêriza lokmayêk nêwenê. Canêk demê ke dergah û cemxaneyê ma rê bikewo, problemê cinî û camerd nêmaneno. Teraqê ma de cîyatîya cinî û camerdan çînyo. Ganî dayîke zî bi bawkalan rayîr bimeşê û erkanê cemî bîyarê cayê xo. Gerê cinî refê verî de ca bigê.”
