Komeleya Mafên Mirovan (ÎHD) û Xizmên Windayan li 4 bajaran çalakî lidar xistin û hesabê qurbaniyên bi zorê hatine windakirin, pirsîn û her wiha piştgirî dan banga Rêber PKKê Abdullah Ocalan.
Komeleya Mafên Mirovan (ÎHD) û Xizmên Windayan li Amed, Êlih, Colemêrg û Îzmîrê li aqûbeta windayan pirsîn û xwestin faîl bên darizandin. Xizmên Windayan aqûbeta qurbaniyên ku di salên 1990î de di binçavan de hatine windakirin û kuştin, pirsîn û xwestin ku faîl bên girtin û cezakirin.
Amed
ÎHD û xizmên windayan di hefteya 838an a çalakiya xwe de, li ber Bîrdariya Mafên Mirovan a li Parka Koşuyolu hatin ba hev. Gelek nûnerên rêxistina civakî ya sivîl û siyasetmedar beşdarî çalakiyê bûn. Di çalakiyê de Hevserokê Şaxa ÎHDê ya Amedê Ercan Yilmaz axivî.
Yilmaz bal kişand ser banga dîrokî ya Rêberê PKKê Abdullah Ocalan û diyar kir ku ji bo çareseriya pirsgirêka Kurd, divê gav were avêtin û ew ê jî piştgirî bidin vê pêngavê.
Di çalakiyê de hate xwestin ku faîlên Cuneyt Aydinlar bên cezakirin.
Êlih
Şaxa ÎHDê ya Êlihê û xizmên windayan, di hefteya 674an a çalakiya xwe de li ber Bîrdariya Mafên Mirovan li Cadeya Gulistanê hatin ba hev. Wêneyên qurbaniyên di bin çavan de hatine windakirin, hatin hilgirtin û gelek kesan piştgirî dan çalakiyê.
Ji rêveberên Şaxa ÎHDê ya Êlihê Huseyîn Elçî li vir axivî û qala çîroka Tahir Aslan û Mehmet Alî Aslan kir ku 1ê Adara 2001an hatin binçavkirin û piştre êdî agahî jê nehatin wergirtin. Elçî ragihand ku heta faîl tên dîtin û darizandin, ew ê têbikoşin.
Colemêrg
Şaxa ÎHDyê ya Colemêrgê û xizmên windayan, di hefteya 164’an a çalakiya xwe de li Kolana Hunerê ya li navçeya Gever a Colemêrgê hatin ba hev. Di çalakiyê de pankarta “Bila winda bên dîtin û faîl bên darizandin” û wêneyên windayan hatin hilgirtin. Di çalakiyê de aqûbeta Mehmet Yaşar hate pirsîn.
Li vir Hevseroka Şaxa ÎHDê ya Colemêrgê Sîbel Çapraz qala çîroka Mehmet Yaşar kir û got, Mehmet Yaşar hîna 32 salî bû, li pêş çavê mirovan hate binçavkirin û piştre hate windakirin.
Îzmîr
Şaxa ÎHDê ya Îzmîrê li ber Konak Eskî Sumerbang çalakî lidar xist. Di çalakiyê de pankartên “Winda wijdan in, xwedî lê derkeve” û “Faîl diyar in, winda li kuderê ne” hatin vekirin. Ji xeynî Parlamentera DEM Partiyê ya Îzmîrê Burcugul Çûbûk, gelek kes beşdarî çalakiyê bûn. Di çalakiyê de li aqûbeta Ridvan Karakoç hate pirsîn ku di 15ê Sibata 1995an de dema hê 34 salî bû hate windakirin û êdî agahî jê nehat wergirtin.
Ji rêveberên Şaxa ÎHDê ya Îzmîrê Caner Canli li vir axivî û diyar kir ku derbarê Karakoç di sala 1994an de biryara girtinê hate dayîn. Canli got ku di 15ê Sibata 1995an de herî dawî agahî ji Ridvan Karakoç hate girtin, lê piştre êdî agahî jê nehat girtin û serlêdan bêbersiv dimînin.
