Na roja tarîxî de ke Mektubê Rayberê Şarê Kurd Abdullah Ocalanî ame wendiş, hetê şarî ra reaksîyonê cîyayî ameybî mojnayene. Rayberê MED TUHAD-FED’î Abdullah Îzgî tehlîl keno û vano ‘No vengdayîş gamêka tarîxî ya.’
Îzgîyî, Ajansa ma reyde pêvînayîşê xo de dîyar kerd ke vengdayîşê Rayberê Şarê Kurd Abdullah Ocalanî seba kurdan û şaranê bînan yew roşnîye daya û no vengdayîş do tesîrê xo heme waranê cuye de ekonomî ra bigîre heta asayîşî biresno.
“Her kes pê keyfweş bî”
Îzgîyî îfade kerd ke na xebere şarî mîyan de zaf baş ameya vînayene û wina dewam kerd: “Nika mesûlîyet yê heme parçeyanê komelî ser o yo. Sey partîyê sîyasî, şar û sazgehî. Ma gere mîyanê nê vengdayîşî dekerê, hem partîyê sîyasî hem şar hem zî sazgehî bixebitîyê ke no proses bireso neticeyêk”
Rolê dewlete û meclîsî
Hetê binî ra Rayberê MED TUHAD-FED’î dîyar kerd ke dewlete zî ganî rolê xo bîyara ca û wina vat: “Dewlete ganî hetê qanûnî ra garantî bida tayê heqan. Ganî şert û mercê serokatî bibê baş. Seba ke bieşko hîna zaf xo biresno şar û înan agahdar bikero.”
Vengdayîşê serokatî û adirbest
Îzgî derheqê adirbest û fesihkerdişî de zî wina dîyar kerd: “Adirbest ameyo ronayene û vengdayîşê serokatî ameyo esasgirewtene. Seba fesihkerdişî zî înan va ganî serokatî bi xo beşdarê kongre bibo. Ganî şert û mercê ey bêrê başkerdene ke o bieşko şêro kongre û karê xo bikero.”
Azadîya fîzîkî her çî ra muhîmêr a
Rayberê MED TUHAD-FED’î Îzgî îfade kerd ke azadîya fîzîkî ya Rayberê Şarê Kurd Abdullah Ocalanî rolêko kilîtî kay kena nê prosesî de û wina dewam kerd: “Nê hetî ra ganî azadîya serokatî ya fîzîkî bêra caardene. Nê karî ganî o bi xo bikero, ganî kongreya xo bîyarê têhet û munaqeşayî bêrê kerdene. No proses ganî qanûnan reyde bêro garantîkerdene ke êyê ke çekan veradanê do şêrê kura se bikerê. Nê babetî hende rehet nîyê, ganî samîmîyet bibo ke no proses bireso peynî. Nê pêro giredayeyê azadîya serokatî ya fîzîkî yê.”
