Newroza emserî bi sloganê “Raybero Azad, Komelo Demokratîk” yena pîrozkerdiş.
Newroza emserî do tewr tay 89 merkezan de bêro pîrozkerdiş. Do startê pîrozbayîyê Newroza emserî 11ê Adare de bi deklarasyonê Amed û Stenbolî bêro eşkerakerdiş, bêro dayîş. Badê 12ê Adare de do adiro vernî yê Newroza emserî, qezaya Licê ya Amedî de bêro tavistiş.
Sloganê pîrozbayîya Newroza emserî zî dîyar bî.
Komîteya Amadekarî ya Newroze sloganê Newroza emserî sey “Raybero Azad, Komelo Demokratîk” kurmancî zî “Rêbertiya Azad Civaka Demokratîk” neql kerd û dîyar kerd. Bi nê sloganî bale ancenê serê vengdayîşê tarîxî yê Rayberê Şarê Kurdî yê Abdullah Ocalanî ke 27ê Sibate de ame eşkerakerdiş.
Pîrozbayîyê Newroze bi serkêşîya Têgêrayîşê Cinîyanê Azadan (TJA), Partîya Herêmanê Demokratîk (DBP), Partîya Têduştî û Demokrasî (DEM Partî) û Kongreya Demokratîke ya Şaran (HDK) yena organîzekerdiş.
