Hemşaredara Şaredarîya Amedî ya Şaristanê Girdî Serra Bucak, New Yorkî de beşdarê Roniştişê 69. yê Komîsyonê Statuyê Cinîyan a Neteweyê Yewbîyayan bîye û perspektîfê têkoşînê cinîyanê Kurdan de şeklê hişmendîya rayberîya herêmkî de Amed nîmûne da.
Beşdarîya Zîrweyê Seypê û Demokrasî
Hemşaredare Bucak beşdarê “Pekin+30ê Heremkîkerdişî: Tevgerê Şaredarîyan, Rayberîya Rayîrê Seypê û Demokrasî” bîye. Zîrweyî de şaredarê dinya, temsîlkarê organîzasyonanê mîyannetewîyan û rayberê femînîstan zî beşdar bîyî.
Rolê cinîyan ame munaqeşekerdiş
çalakî, seba pêtkerdişê rayberîya cinîyan a rayberîya herêmkî, seba munaqeşekerdişê modelê îdareyî ya multi-sewîye ya seypêyîya cinsiyetê komelkî û seba babetê polîtîkayanê femînîstan ê çarçewaya rojeva 2030î ame organîzekerdiş.
Hemşaredare Bucak: Serkêş têkoşînê azadîye bî
Hemşaredare Bucak qiseykerdişê xo de va: “Ez sey Hemşaredara Şaredarîya Amedî ya Şaristanê Girdî tena ney, eynî wextî de zî sey aktîvîste tîya ya. Cinîyanê Kurdan mîyanê tarîxî de tena seba azadîya xo ney, heta seba azadîya şaran zî têkoşîn kerdo. Ganî ma estbîyayîşê cinîyan û têkoşînê înan ê heremkî, asta globale de vêşêr bikerê.
Ma felsefeyê şaredarîyêka demokratîke, ekolojîke û azadîwaza cinîyan virazenê. Sistemê hemşaredarîye tena para wezîfedaran nîyo, eynî wextî de meclîsanê cinîyan ra heta koordînasyonanê cinîyan mekanîzmayêka demokratîka orijinal a.”
Reaksîyon vera politikayanê qeyyûmî
Bucak bale ant ke qeyyûmê ke şaredarîyanê DEM Partî rê ameyî tayînkerdene, eynî wextî de vera têkoşînê cinîyan ê. Aye va: “Îradeyê şarî ameyo xesbkerdene. Nê polîtîkayî tena vera rayberanê weçînîyayeyan nîyê, eynî wextî de vera cinîyan ê zî. Têkoşînê cinîyan sînoranê netewî de nêmaneno. Ganî ma seba pawitiş û xurtkerdiş estbîyayîşê cinîyan hemparîya mîyannetewî bikerê aktîf.”
Tevgerê cinîyan û prosesê aştî
Bucak îfade kerd ke Tirkîya de seba çareserîya meseleyê Kurdan muzakereyê aştî beno û va: “Ganî cinî unsurê eslî yê prosesê aştî bibê. Seke Rojeva 1325 de yeno vatene, ganî cinî polîtîkayanê aştî û emnîyetî de rolo aktîf bigîrê. Tevgerê cinîyanê Kurdan, hêzo tewr pîl o seba ke no proses bireso serkewtişî.”
Bucak qiseykerdişê xo bi vateyê “Jin, Jîyan, Azadî!” qedêna.
