Newroza emserrî bi sloganî “Raybero Azad, Komelo Demokratîk” yena organîzekerdiş. Newroza 2025î binê sîya “Vengdayîşê Aştî û Komelo Demokratîk” ê Rayberê Şarê Kurdî Abdullah Ocalanî de yena pîrozkerdiş.
Ewro Newroza tarîxî Amedî de yena organîzekerdiş. Parka Newroze yan zî Meydanê Newroze bi alayanê DEM Partî, DBP’yî û alayanê “Newroz pîroz bo” ameyê xemilnayene. Meydanê Newroze paweyê bi se hezaran kesan o û şar do 6 keyberan ra bikewo meydan. Yew keyber zî seba protokolî û çapemenîye ameyo cîyakerdiş.
Meydanî de pankartanê ke sernuşteyê cîya-cîyayan ser de yê, ameyê daliqnayene. Hem zî pankarteyê resimê Kemal Kurkutî ê bi sernuşteyê “Kemal Kurkut bêmirin o” ameyo daliqnayene. Pankartê Newroze ke sahne ser o ameyo daliqnayene bi zaf ziwanan Roşanê Newroze pîroz kerdo. No zî pirrengînîya Newroze nîşan dano.
Saete 10î de keyberê meydanî ameyî akerdiş û ameyîşê welatiyan ê meydanî dest pêkerd. Bi des hezaran welatî yenê meydanî. Welatî bi cil û berganê Kurdkî û bi xemla Newroze cayê xo meydanî de gênê. Domanî ra bigîre heta kal û pîrî yenê meydanî. Tayê welatî ke nêweş ê zî yenê meydanî. Balkêş o ke welatîyêko ke milê ey de serûm bî zî embazan reyde ame pîrozkerdişî.
Komîteya Hazirkerdişî ya Newroze, çar hetanê Kurdistanî û teber ra dawetname şawito û mêmanî dawet kerdê pîrozkerdişî. Hem zî emser 629 rojnamegeran seba akredîtasyonî serî DEM Partî da ke pîrozkerdişê Newroze taqîb bikerê.
Resimê Rayberê Şarê Kurdî Abdullah Ocalanî û Heyetê Îmrali yê ke 27ê Sibate de Hepisxaneyê Girawa Îmrali de ameyo antene zî meydanî de ame daliqnayene.
Bernameyê Newroze
Do bername bi hurmetê seba cangorîyanê têkoşînê azadî û demokrasîya Kurdistanî yê ke cuya xo vindî kerda, dest pêbiko.
Dima do qiseykerdişî bêrê kerdene. Nameyê Komîteya Hazirkerdişî de do qiseykerdişo destpêkî bêro kerdene. Dima do koma rîbabê vejîyo dikî ser.
Do Komîteya Hazirkerdişî ya Newroze vejîyo sahne ser û şarî silan bikero. Hemserekê DEM Partî û DBP’yî yê Amedî, Hemşaredarê Amedî Serra Bucak û Dogan Hatun do vejîyê sehne ser o û şarî silam bikê. Do yew hemşaredar qisey bikero.
Dima do nameyê Tîfaqê Kurdistanî parlementerê DEM Partî Mehmet Kamaç qisey bikero û peyaman bido.
Deyîrbaz Arhat do vejîyo sehne ser o û deyîra vajo. Dima do aktîvîsta Tevgera Cinîyanê Azadan (TJA) Sabahat Tuncel qisey bikera û peyaman bida. Do pêşkêşkerdişê sînevizyonî bivirazîyo. Dima zî do avûkatê Buroyê Huqûqî yê Seserre û endamê Şandeya Îmrali Ozgur Faîk Erol qisey bikero û peyaman bido.
Do reyna bernameyê muzîkî dest pêbiko û do deyîrbaz Ayfer Duzdaş deyîran vajo.
Do badê muzîkî qiseykerdişî bêrê kerdene. Hemsereka Pêroyî ya DBP’yî Çîgdem Kiliçgun Uçar do qisey bikera û peyaman bida. Do reyna mabênê sdeyîran bidîyo û deyîrbaz Rewşan Çelîker do vejîya dikî ser.
Dima Hemserekê Pêroyî yê DEM Partî Tuncer Bakirhan do vejîyo sehneyê ser o û babetê ke rojevî de yê do derheqê înan de erjnayîşan bikero.
Tewr peyîn de zî do Grup Avna do vejîya sehneyê ser o û deyîran vajoS.
Kemal Kurkut do bêro vîrardene
Wendekarê Zanîngehî Kemal Kurkut, Newroza Amedî ya serra 2017î de, Cadeyê Evrîm Alataşî de hetê polîsan ra ame kiştene. Do sibayî Komîteya Hazirkerdişî ya Newroze û komêk sîyasetmedarî verê bernameyê Newroze, cayê ke Kemal Kurkut tede ameyo kiştene, ey bîyarê vîrê xo û dima biresê protokolê Newroze.
