Hemsereka Stenbolî ya DEM Partî Arîfe Çinar pîrozbayîyê Newroza emserrî erjnayî û vat ke se hezar kesî qadan de wayîrê vengdayîşê Abdullah Ocalanî vejîyayê û waştişê xo yo seba demokratîkbîyayîşî ardo ziwan.
Newroza emserrî seba “Vengdayîşê Aştî û Komelo Demokratîk” ê Rayberê Şarê Kurdî Abdullah Ocalanî ke 27ê sibate de raya pêroyî rê ame parekerdene, heme cayê dinya de bi coşêko pîl û beşdarîyêka girde ameye pîrozkerdene. Qadanê Newroze ra waştişê azadîya fîzîkî ya Abdullah Ocalan, vengdayîşo tarixî û waştişê awankerdişê komelo demokratîk vejîyayê vernî.
Hemsereka Stenbolî ya Partîya Têduştî û Demokrasîyî ya Şaran (DEM Partî) Arîfe Çinar derheqê pîrozbayîyanê Newroza 2025î û waştişê ke vejîyayê vernî Ajansê Mezopotamya (MA) rê qisey kerd.
‘Seba vengdayîşî tewrbîyayîş xurt bî’
Arîfe Çinar dîyar kerd ke Newroza emserrî Kurdîstan û Tirkîya de bi çoşêko pîl ameye pîrozkerdene û vat: “Bi taybetî zî tewrbîyayîşê cinî û ciwanan zaf bî. Newroza Stenbolî goreyê serranê bînan hîna qelebalix bîye. Sebebê nê zî birêz Ocalan bî. No vengdayîş seba şaran bî hêvî. Na hêvî tesîrê xo Newroze ser o kerd. Tirkîya 22 serrî yo bi rejîmê yewcamêrdî yena rayraberdene. Heme ca de zilmêko pîl est o. Bêhêvîyeya ke riyê zilmî ra vila bîya, bi vengdayîşê birêz Ocalanî bedilîyaye, bîye hêvî. Qadanê Newroze ra şar waştişê demokrasî, heq û edeletî kerd. No mojneno ke vengdayîş çend muhîm o. Ma zî do heme ca de netîce û waştişanê şarî bîyarê ziwan.”
Mesajê şaran demokratîkbîyayîş bî
Arîfe Çinar dewamê qiseykerdişê xo de ard ziwan ke Newroze seba heme şaran wayîrê manayêko cîya yo û vat: “Seba şarê kurd her tim bîya roşanê vejîne. Newroza emserrî bi vengdayîşê birêz Ocalanî bîye roşanêko sembolê vejîna kurdî. Se hezar kesî qadê Newroze pirr kerdê, mesajê wayîrvejîyayîşê vengdayîşê Abdullah Ocalanî da. Mesajo bîn zî vera krîzê ekonomîk, nêzdîbîyayîşo pewpawitox û xespkerdişê îrade bî. Reyna cinîyan sere de cayê xo girewt û serewedaritişê xo yê vera qirkerdişê cinîyan ard ziwan. Newroze bi temamî bîye vengê waştişê demokratîkbîyayîşê Tirkîya, Şar nê mesajî da.
Arîfe Çinar wina dewam kerd: “Mesajêko bîn yê Newroze xurtkerdişê têkoşîno hempar yê şaran û yewîye bî. Şaran rê awankerdişê komarêka aştîyane û demokratîk lazim a. Nêzdîbîyayîşê verademokratîkî Kurdîstan de demêko derg o dewam kenê, tesîrê xo Tirkîya de zî kerdê. Eke demê xo de vera qeyûmanê Kurdîstanî reaksîyon biameyêne dayene, ewro Stenbol nêameyêne xespkerdene. Girewtişê Îmamogluyî tesîrê nêzdîbîyayîşanê verademokratîkî yê Kurdîstanî yê.”
