Vengdayîşê Rayberê Şarê Kurdî Abdullah Ocalanî ser o 40 rojî derbaz bîyê zî tu gamî nêameyê eştiş. Cinîyan bale ant babete ser o û wina vat: “Wa dewlete gaman bierza. Wa azadîya Birêz Ocalanî bîyarê ca.”
Rayberê Şarê Kurdî Abdullah Ocalanî badê pêvînayîşê ke 27ê sibate de heyetê Îmraliyî reyde kerd, vengdayîşê “Aştî û Komelo Demokratîkî” kerd. No vengdayîşo tarîxî Kurdîstan, Rojhelatê Mîyanên û xeylê cayanê dinya de gulbang da. La pêwa ke 40 rojî vengdayîşî ser o derbaz bîyo, îqtîdar tu gamî nêeştê.
Cinîyan derheqê babete de erjnayîş kerdî û dîyar kerd ke ganî îqtîdar gaman bierzo.
‘Wa aştî û azadîya Birêz Ocalanî bîyarê ca’
Sevkîyat Saglam da zanayîş ke ê sipasîyê xo semedê Rayberê Şarê Kurdî Abdullah Ocalanî kenê û aştî wazenê. Sevkîyat Saglam wina va: “Ma azadî, aştî û edalet wazenê. Ma semedê Birêz Ocalanî azadî wazenê. Ma şer nêwazenê. Wa dewlete êdî gaman bierza, averşîyayîş virazîyo. La hema zî dewlete ra tu veng çin a.”
‘Dewlete aştî nê, teslîmîyet wazena’
Meryem Tuncer zî rojbîyayîşê Rayberê Şarê Kurdî Abdullah Ocalanî pîroz kerd û wina va: “4ê Nîsane semedê ma şarê kurdî pîroz o. Ez roja şarê kurdî pîroz kena. Ma aştî û azadîya birêz Ocalanî wazenê. Ma dewlete ra gaman pawenê. Wa êdî destê aştî derg bikerê. Wa destanê xo Rojawan, zozanan, welatê ma, dewanê ma ser o ra biancê. Ma aştî wazenê. Ma aştî pawenê.”
‘Wa dewlete destê aştîye derg bikera’
Asya Ozlu zî va ke ê bi serran o aştî wazenê û wina va: “Çimê ma mesajêko biveng yê Birêz ocalanî de bî. Bi serran o ma aştî wazenê. Mesajê Birêz Ocalanî semedê ma pêrûne bî moral. La hema Tirkîya gamêke nêeşta. Ma aştî wazenê. Wa gonî nêrija û kes nêmiro. Ma birêz Ocalanî mîyanê xo de wazenê.”
