Endama Komîteya Merkezî ya PKK’yî Hêlîn Umît seba ke îqtîdar gaman nêerzeno, persêko winasîn kerd: “Îqtîdar raşta demokratîkbîyayîşê Tirkîya wazeno?”
Endama Komîteya Merkezî ya PKK’yî Hêlîn Umît programêkê taybet yê Medya Haber TV’yî de rojevî erjna. Qiseykerdişê Hêlîne Umît ra qismêk wina yo:
“Eslê xo de dormeyê eşkerayîya 27ê sibate de rojevêko muhîm virazîya. Munaqeşeyî yenê kerdene. Xora nê qîm nêkenê. Teberê çîyanê ke rayapêroyî eşnawitî, pêkerdişêko bîn çin o. Ma nê zanê: Rayber Apoyî înîsîyatîfêk girewto xo ser, proseso ke wazeno aver bero est o, na çarçewa de vengdayîşêk kerd. Dima ra partîya ma zî eşkerayîye daye. Embazî hewte de reyêk erjnayîşan kenê. Yew zî cepheyê îqtîdarî ra eşkerayî yenê kerdene.
Verê her çîyî ez zî wazenê nê vajî. Ma konjonkturê muhîm ra prosesê muhîmî ra ravêrenê. La tayê hetê ci yê problemin est ê. Mesela îqtîdar vano wa kongre bêra kerdene, çekî bêrê ronayene û na mesela biqefilîya. Nê nêzdîbîyayîşî raşt nîyê. Çunke meseleya kurdan seserrê Komara Tirkîya girewte. Îqtîdar bi qesawetî nêzdî beno la eslê xo de rîsko tewr gird Rayber Apoyî girewt û gama tewr muhîme zî ey eşte. Wa no zî raşt bêro famkerdene; PKK hêzdar o û her hetî ra hêzê xo ramojneno. Ma her serre Newroze sey referandumî vînenî. Çunke Newroze bi PKK’yî bîye Newroze. Ma na Newroze de dî ke PKK her wextî ra hêzdar o.
‘PKK xo bi xo nêeşkeno xo fesih bikero’
Înan verê çimanê dinya de veng da. Rayberîye gamê ke hewce kenê eştî. Nika îqtîdar wazeno mesele bikirişo zemînê sîyasî û hiqûqî ya nê? Perso esas no yo.Çunke Tirkîya de hetêko xurt est o ke şerî rant fînenê dest ke nê mîyanê îqtîdarî de zî est ê. Erdogan û Bahçelî mudaxaleyê nê hetê rantî kenê? Raşta demokratîkbîyayîşê Tirkîya wazenê? Gerek verî qerarê nê bidê. Xususêko muhîm no yo. Êdî çew nêeşkeno kurdan înkar bikero. Her kes kurdan şinasenno, estbîyayîşê kurdan zano, zano ke êdî wina nêşino.
Çarçewaya nê munaqeşeyan de çîyo bîno ke ez vana, derheqê kongre de yo. Vanê qey vengdayîşê Rayber Apoyî ra dima kongre nêkenê. Wina muanqeşeyî dewam kenê. Vanê heta ewro PKK’yî senî ke kongreya xo tena kerde, wa nika zî wina bikero. Raşt o PKK eşkeno bi xo kongreya xo bikero la nika rewşe cîya ya. Xususê sey fesihkerdişê PKK’yî, bedilnayîşê stratejîkî, ronayîşê çekan bi qerarê Rayberîye benê. Raşt o PKK wexto ke hewce kerd qerarê xo bi xo grewtî û pratîk de zî ardî ca. La bedilnayîşê stratejîkî bi xo nêkerdî. PKK xo bi xo nêeşkeno xo fesih bikero. Bê Rayberîye nêeşkeno nê bikero. Tena Rayberîye eşkeno nê bikero. Ma kongre bikerî zî no qerar nêvejîyeno, bivejîyo zî ciwanî nêvindenê. Gerek no hol bêro famkerdene. Têna raştîya Rayberîye eşkena nê bikera. Coka gerek şertê Rayberîye bêrê bedilnayene û azadîya ci ya fîzîkî bêra caardene.
‘PKK xo bi xo nêeşkeno xo fesih bikero’
Ti hem vanê bêrê heqê hêvî bişuxulnê, DEM de sîyaset bikerê û hem zî gamêk nêerzenê. Dima ra zî vanê şima kongre nêkenê proses sabote kenê. Nika ez persena kam sabote keno? Ma ne hetê îqtîdarî de yê ne zî hetê muxalefetî de yê. PKK xo bi xo nêeşkeno xo fesih bikero. Ma wazenê wa pêro meseleyî na çarçewe de bêrê çaresekerdene. Ma Tirkîya de hêzo serkêş ê têkoşînê demokratîkî yê.”
