Roniştişê 2.yê 15 kesan ke cînayetê Narîn Guran de seba sucê “nitimişê sucdarî” yenê muhakemekerdene, dest pêkerd.
Gedaya 8 serrî Narîn Guran 21ê tebaxa 2024î de dewa Çûlî ya qezaya Rêzanî ya Amedî de vîndî bîye û 19 rojî ra pey cenazaya aye ameyê vînayene. Roniştişê dîyin ê dewaya dîyine ya derheqê cînayetê Narîn Guran de dest pêkerd. Kiştişê Narîn Guran de derheqê 15 kesan de bi sucê “nimitişê sucdarî” dewa ameybî akerdene. Roniştiş Mehkemaya Cezayanê Pêroyî ya 17. ya Amedî de yena kerdene.
Dewa de datkênaya Narîn Guran ya bi nameyê Bîrsen Guran, datê aye Fûat Guran, cinîya datê aye Maşallah Guran, merdeyê ema aye Mehmet Şevket Kaya, lajê ema aye Muhammed kaya û karkerê Salîm Guran ê bi nameyê Mehmet Selîm Atasoy sey gumankerdeyê girewteyî; kênaya ema Narîn Guran a bi nameyê Şeyma Kaya, cinîya datê aye Hedîye Guran, datê aye Îbrahîm Halîl, Bariş, Kurtuluş û Omer Faruk Guran û gedeyê bi nameyê R.A (16), M.G (16) û Î.K (17) zî sey versucê ke girewte nîyê, yenê muhakemekerdene.
Avûkatanê versucan û merdimanê înan ra vêşêr destûr nêame dayene ke bikewê salona roniştişî. Roniştişî de şahîdî yenê goşdarîkerdene.
