Xizmên Windayan û Şaxa ÎHDa Amedê di hefteya 846emîn de qurbaniyên Komkujiya Ermenan hatin bibîranîn û hat xwestin dewlet hesab bide.
Xizmên Windayan û Komeleya Mafên Mirovan (ÎHD) a Şaxa Amedê bi boneya winda bên dîtin û kujer bên darizandin li Parka Koşuyolu kom bûn û li ber Bîrdariya Mafê Jiyanê çalakiya xwe “Bila winda bên dîtin û kujer bên darizandin” li dar xist. Di çalakiya hefteyê 846emîn de qurbaniyên Komkujiya Ermenan a 24ê Nîsana 1915an hatin bibîranîn. Xizmên Windayan, endam û rêveberên ÎHDê û bi dehan kes tev li çalakiyê bûn. Di şexsê helbestvan Taniel Varujan ê Ermen de li aqûbeta qurbaniyên Fermana Ermenan hatine windakirin hat pirsîn.
Ewilî endamê ÎHDê Gunal Kûrşûn axivî û bi bîr xist ku ew çalakiyê ji bo edelêtê didomînin û wiha got: “Ev 30 sal in çalakî didome. Li Tirkiyeyê di navbera 15 û 20 hezar kes hatiye windakirin. Em xizmên windayan silav dikin, tu car xwe tenê nebînin.”
‘Ew berxwedana dayikan bi rûmet e’
Rêveberê Yekitiya Tabîban Dr. Mehmet Şerîf Demîr jî axivî û li ser navê saziya xwe silav li beşdaran kir û wiha got: “Em wekî Yekitiya Tabîban we hemûyan silav dikin. Em li ber têkoşîna we bejna xwe ditewînin. Heke aştî were vî welatî divê di serî de dengê dayikên/malbatên windayan were bihîstin. Ev pirsgirêka Kurd 50 sal in didome, di encamê de gund hatin şewitandin, însan hatin îşkencekirin. Ev berxwedana dayikên windayan bi rûmet e.”
‘Heta yek kes jî ji me bimîne em ê li vir bin’
Hevserokê Giştî yê ÎHDê Huseyîn Kuçukbalaban jî axivî û da zanîn ku ev çalakî bi ked û têkoşîna dayikan dest pê kir û ev yek anîn ziman: “Di 27ê Gulana 1995an de ev çalakî dest pê kir. Heta ku dayikek bibêje zarok, xizmên me windayî ne, wê ev çalakî berdewam bike. Îro he jî tecrîd didome. Di fermana, şewitandina gundan de kiryar nehatin darizandin. Em jî dibêjin ji bo pêvajo li pêş bikeve divê demildest kiryar bên darizandin.”
Rêveberê ÎHDa Amedê Alî Îhsan Demîrtaş serpêhatiya windakirina helbestvanê Ermen Tanîel Varujan xwend.
Serpêhatiya windakirina Tanîel Varujan wiha ye:
“Di 24ê Nîsana 1915an de bi gotina wezîrê kare hûndir ya hikûmeta Îttîhat û Terakî Talat Paşa ve li ser Ermeniyan êriş pêk hatin. Rewşenbîrê Ermeniyan hatin binçavkirin. Yek ji van rewşenbîran jî helbestvan Tanîel Varujan bû. Tanîel Varujan di sala 20ê Nîsana 1884an de hatiye dinê. Tanîel Varujan ê 31 salî bavê 3 zarokan bû di 24ê Nisanêa 1915an de hat binçavkirin. Dema ku hat binçavkirin, polîsan ji Tanîel û hevalên wî re got, ‘hûnê di nava saetekî de werin berdan’. Tanîel Varujan 25ê Nîsanê sewqî Çankiriyê hat kirin, ji vir jî di 26ê Nîsanê de bi tevî 4 hevalên wî ve dibin girtîgehê. Tanîel Varujan û 4 hevalên wî dema ku ber bi girtîgehê ve derdixin rê ji hevalên xwe yê Çankiriyê re dibêjin, ‘me dibin mirinê, li zarokên me binêrin’. Komeke çete êrişî trênê dike. Lê leşker êrişê asteng nakin. Tanîel Varujan û 4 hevalên xwe bi hovane tên kukştin.”
Piştî daxuyaniyê ji bo bîranîn Tanîel Varujan û hemû windayan çalakiya rûniştinê hat lidarxistin û çalakiya vê hefteyê bi dawî bû.
