Amed – Nîmet Degîş ê 68 salî piştî 30 sal û 8 mehan di Adara 2023yan de hatibû berdan. Nîmet Degîş ji ber ku 9 meh cezayê hepsê lê hatibû birîn, ev ceza hate erêkirin û îro dîsa hate girtin.
Girtiyên nexweş Nîmet Degîş (68) e li Girtîgeha Tîpa S a Kirşehîrê dihat ragirtin piştî 30 sal û heşt mehan di 11 Adara 2023yan de hatibû berdan. Dema Nîmet Degîş û çend hevalên xwe li Girtîgeha Bolûyê diman, serê kameraya ku li hewşa qawişa lê diman dinêrî, daxistibûn jêr û hesinê wê xwar bûbû. Dadgeha Înfazê ya Bolûyê bi îdiaya “Zirar dane malê cemaweriyê” 9 meh cezayê hepsê li Nîmet Degîş birî. Dadgeha Destûra Bingehîn ji ber ev ceza pejirand, Nîmet Degîş îro danê êvarê birin Girtîgeha Servekirî ya Amedê. Nexweşiyên Degîş ên weke faranjît, guatr, fitiq, gurçik, mîde, prostat, nebihîstin, hestiyan, sendroma lingan, vertîgo û rûviyan hene. Nîmet Degîş beriya ku were girtin ji Ajansa Welat re axivî.
‘Ji ber poşmantî qebûl nekir berdana wî hatibû taloqkirin’
Nîmet Degîş diyar kir ku ji ber “poşmantî” qebûl nekir berdana wî hatibû taloqkirin û wiha got: “Dixwestin em poşman bibin, teslîm bibin, dixwestin tu ji xwebûna xwe derkevî. Dibêjin ya zindan cihê kedîkirinê ye. Dixwestin bibêjin ‘me ev kes di zindanê de kedî kir, teslîm girt’. Gelek caran teklîf kir. Min ji wan re got tevî van salan hûn çawa fêdî nakin ku vê teklîfê dikin. Rojekê malbat hatibû hevdîtinê çawa malbat çû midûr û dozger gazî min kirin. Dozger dixwest min berde lê çavên midûr li şewitandina înfazê bû. Esas midûrê Girtîgeha Mereşê kontra bû ne yekî normal bû. Bi taybetî hatibû peywîrdarkirin. Min bersiva wan weke ku fêm bikin da wan û ez çûm qawişê. Hevalên ku berdana wan nêzîk dibû li ser vê bingehê nêzîk dibûn.”
‘9 meh ceza lê birîn’
Nîmet Degîş têkildarî meseleya kameraya di qawişê de jî ev agahî dan: “Jiyaneke me, çandeke me heye. Ji çanda me aciz in. Ji bo çanda me ji holê rakin gelek caran hewldanên wan ên provokasyonê çêbûn. Me jî serê kamerayê anî xwarê. Înfaza gelek hevalan şewitandin. Dû re ben, teştî, çekpas û tu tiştên me nehiştin. Ew jî ji me re weke çek girtin dest. Dû re em birin dadgehê. 2 sal ceza li me birîn. Pişt re hevalan serlêdan kirin. Jinûve darizandin û dû re 9 meh ceza li min birîn.”
‘Ez ê çawa di girtîgehê de bimînim’
Degîş, da zanîn ku di 18ê Nîsanê de bi motosîkletê qezayek kiriye û wiha domand: “Hêj jî destên min nagirin. Nikarim cilên xwe li xwe bikim. Çûyîna min a tuwaletê jî wisa ye. Ka ez ê çawa di girtîgehê de bimînin. Lawê min beriya 10 rojan ez birim cem dozger. Li wan deran perîşan bûm. 3-4 saetan li wan deran di vî halî de mam. Li malê jî di tuwaletê de ez serhişê xwe çûm ketim serê min şikest. Ez ê çawa bi vî halî bikevim girtîgehê nizanim. Gotin dê li girtîgeha servekirî bimînî û zû derkevî. Nikarim avê vexwim destên min diricifin.”
‘Girtina min parçeyek ji şerê taybet e’
Degîş, destnîşan kir ku ji bo hebûna xwe têkoşînê didin û wiha got: “Ev komar li ser tunebûna me hatiye avakirin. Lê em mafên xwe dixwazin. Ew îmha û înkarê li me ferz dikin. We 30 sal û 8 mehan encam negirt. Dixwazin faşîzmê li ser lingan bihêlin. Dixwaze çav bitirsîne. Li ser gelê kurd û civaka tirk polîtîkayên şerên taybet bi awayekî hovane tên meşandin. Ev girtina min parçeyek ji şerê taybet e. Te dîl digire. Çima ji bo ku yên li pişt te bitirsin.”
Nîmet Degîş kî ye?
Girtiyên nexweş Nîmet Degîş (68) ê li Girtîgeha Tîpa S a Kirşehîrê dihat ragirtin piştî 30 sal û heşt mehan di 11 Adara 2023yan de hate berdan. Degîş ê ku di Tîrmeha 2022yan de înfaza xwe temam kiribû, diviya bû hatibûya berdan lê bi hinceta pirsên “tu poşmanî?” , “Dema tu derketî dê biçî ku derê?” yên rêveberiya girtîgehê ne bersivandin berdana wî 8 mehan hatibû taloqkirin.
Degîş, di sala 1992’yan de bi hinceta ku îfade li ser wî hebûye li navçeya Farqînê ya Amedê hatibû binçavkirin. Degîş 40 rojan di binçavan de mabû û îşkence lê hatibû kirin. Pişt re jî Dadgeha Ewlehiyê ya Dewletê (DGM) bi îdiaya “endamtiya rêxistinê” cezayê muebedê (36 sal) lê birîbû. Degîş ê ku li Girtîgeha Tîpa L a Turkoglû ya Mereşê dihat ragirtin, piştî erdhejê sewqî Girtîgeha Tîpa S a Kirşehîrê hatibû kirin.
