Hevseroka TEV-DEMê Remziye Mihemed anî ziman ku li Minbicê şerekî pir giran heye û wiha got: “Bi çekên giran êrîşî Minbicê dikin. Tirkiye dixwaze Minbicê dagir bike.“
Li Sûriyeyê pêvajoyeke nû dest pê dike. Piştî hilweşîna Rejîma Esad li Sûriyeyê kaos û şer giran dibe. Ji ber êrîşên komên çete zêdeyî 100 hezar koçberên Şehbaye disa koç kirin. Li dijî Minbicê êrîşên giran û şerekî giran heye. Bi taybetî peymanên navneteweyî HTŞ ket nava tevgerê û dest bi dagirkirina Helebê kir. HTŞê di 26-27ê Mijdarê de dest bi êrîşên li ser gund û taxên Helebê kir û di nava 3-4 rojan de Heleb dagir kir. Piştî wê Hema û Hems dagir kir û di 8ê Kanûnê de jî ket Şamê û hikûmeta Şamê ket. Roja ku Şam ket, Serokê Dewleta Sûriyê Beşar Esad Şam terk kir û berê xwe da Rûsyayê. Di vê pêvajoya ku HTŞ ket nava tevgerê û Heleb dagir kir, li aliyê din komên çekdar ên wekî OSO, Sultan Murat û Ceyş El Vatanî li dijî herêmên Rêveberiyên Xweser ên wekî Minbic, Şehba û Til Rifatê dest bi êrîşan kirin. Ji ber êrîşên zêde koçberên Şehba û Til Rifatê ku berê di sala 2018an de ji Efrînê koçber bûbûn dîsa koçber bûn. Nêzî 100 hezar koçberên Şehbayê hatin li Tebqa, Reqqa û herêmên din ên Rêveberiyên Xweser bi cih bûn. Niha li Minbicê şerekî pir giran heye.
Hevseroka Tevgera Civaka Demokratîk (TEV-DEM) Remziye Mihemed der barê geşedanên dawî de nirxandin kir û anî ziman ku li Sûriyeyê kaosek heye.
Hevseroka TEV-DEMê Remziye Mihemed ewil ewil bal şikand ser rewşa Sûrî û wiha got: “Li Sûrî û bi taybet li Bakur û Rojhilatê Sûrî pêvajoyek nû heye. Bi hilweşandina rejîma Baasê re guhertina dîrokî pêş ket. Ev guherîn li gelê Sûrî û tevahiya gelê me pîroz be. Niha rewş gelek aloz e. Gelek bûyer pêş dikevin. Li Til Rifhatê beriya ku rejîm hilweşe, gelê me li Şehba û Til Rifhatê bi zorê ji cihê xwe hat koçberkirin. Bi giştî gelê me yê Şehba û Til Rifhatê koçber bûye. Gelekan ji wan berê xwe dane Efrînê. Hinekan berê xwe dan Şêxmeqsûdê. Hejmarek mezin jî koçî Tebqa û Reqayê kirin. Bi alîkariya saziya Rêveberiya Xweser û civaka sivîl niha bi cih dibin. Gelê me koçberên me yên Şehba û Til Rifhatê hembêz dikin. Xwedîderketinek mezin heye. Hevgirtinek mezin heye. Ev têkoşîna gel nîşan dide.”
Li Eyn Îsa komkujî pêk anîn
Hevseroka TEV-DEMê Remziye Mihemed anî ziman ku bi taybet 12-13 roj in li ser Minbicê êrîşek giran heye û wiha axivî: “Di van êrîşan de armanca dewleta dagirker û dewleta Tirkiyeyê ew e ku Minbicê têxe bin destê xwe. Li dijî wê gelê me yê li Minbicê û hêza parastinê wekî HSDê di 2-3 rojên dawî de derketiye asta jor. Di 2-3 rojên dawî de rastî êrîşên giran tên. Bi çekên giran êrîşî Minbicê dikin. Her çiqas bi çekên giran êrîş bikin û êrîş giran be jî li dijî vê yekê şervanên gelê Minbicê li dijî wan li ber xwe didin. Li dijî êrîşan berxwedanek mezin heye. Gelek êrîşên Dewleta Tirk vala derxistin. Heta niha jî êrîş didome. Lê li dijî van berxwedana şervanan heye Di 9ê Kanûnê de li Eyn Îsa êrîşî malbatekê kirin. 13 kes şehît kirin. Ji wan 6 zarok bûn. Dîsa li ser gundewarên Zerganê êrîş hene. Di van êrîşan de maşîneyek rastî êrîşan hat. Kesên birîndar hene. Di van êrîşên gundên Zerganê zehmetiyên mezin derdixin. Dîsa li ser gundên Kobanê hene. Wekî ku tevahiya Sûriye hilweşiya bin, gelek komên çeteyan derketine holê. Her komek dixwaze parçeyekî ji Sûriyê bike. Her komek bi armanca ku parçeyek axa Sûrî ji bo xwe dagir bikin êrîş dikin.”
Divê em parastina cewherî pêş bixin
Hevseroka TEV-DEMê Remziye Mihemed, da zanîn ku tevî êrîşên heyî jî bombebarankirina li ser herêmê çêdibe dîsa kelecanek heye. Tevahiya Sûriye kelecanekê dijî. Bi taybetî herêma Bakur û Rojhilatê Sûrî, ji bo parastina xwecihî û ji bo şerê gelê Şoreşgerî, şoreş pêş dikeve. Ji bo em karibin nirxên şoreşa xwe biparêzin û em karibin destkeftiyên şoreşa xwe biparêzin û projeya xwe ya Neteweya Demokratîk bi ser bixin, divê em hîn zêdetir parastina cewherî pêş bixin û parastina xwe xurt bikin. Divê em yekîtiya pêkhateya gelan xurt bikin. Pêwiste em saziyên civaka demokratîk li şoreşa xwe û neteweya demokratîk xwedî derkevin. Çawa me destpêka şoreşê bi civaka demokratîk dest pê kir; em ê serkeftina şoreşê jî bi civaka demokratîk û hevgirtina gelan û şerê şoreşgerî û parastina nirxên şoreşê bi ser bikevin. Em ê bi yekîtiya gelan, parastina nirxên şoreşgerî li ser esasê azadiya gelan, jiyana hevpar, li ser esasê hevgirtina gelan ku têde de edalet, parastina çanda gelan û demografiya gelan tê parastin, biparêzin.”
