Platformê Weşîye yê Amedî û Şûbeyê SES’î yê Amedî bi munasebetê problemê nêweşxaneyan û hewteyê ewleyî û weşîya karî waşt ke rewşa înan a çetine bêra rastkerdene.
Şûbeya Sendîkaya Kedkaranê Weşîye û Xizmetê Komelî (SES) ya Amedî seba hewteyê ewleyî û weşîya karî û problemê karkeranê tendurîstîyî vernîya nêweşxaneyê Gedeyan eşkerayî daye. Xeylê doktorî beşdarê eşkerayî bîyê. Çalakîkeran çalakî de pankartê “Ewleyîya karî tercîh nîyo, mecbûrî yo” akerd.
Temsîlkarê SES’î Serdar Buyukdenîz eşkerayî de wina vat: “Rixmê heme vatişanê ma, problemî nêyenê çareserkerdene. Bi munasebetê 8-14ê gulane Hewteyê Ewleyî û Weşîya Karkeran ma wazenê reyna bîyarê vîrê şima. Başkerdişê şertanê xebatî yê ewleyîye heqêk o. Nêweşxaneyê ma de problemî dewam kenê. Erdlerzî Mereşî ra pey raporê erdlerzî yê nêweşxaneyî nêameye eşkerakedene. Amed de nêzdîyê 700 hezar gedeyî est ê. Heme gedeyî nê nêweşxaneyê qelsî de yenê demankerdene. Ma nê qebul nêkenê.”
Serdar Buyukdenîz da zanayene ke kemaneyê karkeranê weşîye est ê û wina vat: “Ma wazenê ke hûmara karkeran bêra vêşîkerdene û kar bêro kêmkerdene. Ganî nêweşxaneyê ma de 536 hebî hemşîre 46 hebî zî ebeyî est bî. La hûmara hemşîre û ebeyan 285 a. Ma veng danê wezaretê weşîye û heme rayedaran ke berpirsîyarî û wezîfeyanê xo yê qanûnîyan bi ca bîyarê û goş bidê xebatkaranê weşîye.”
Eşkerayî bi slogananê “Bijî berxwedana karkeran” qedîyaye.
