Seba di pêşanganê PKK’yî Alî Haydar Kaytan û Riza Altûn do xeylê şaristanan de programê vîrardişî bêrê organîzekerdene.
Partîya Karkeranê Kurdîstanî (PKK) 27ê Teşrîna Peyêne ya 1978î dewa Fîsî ya qezaya Licê Amed de ameye ronayene. PKK’yî ewro 12ê Gulana 2025î eşkera kerd ke heme xebatê xo qedênayê û fesif kerdo. No qerar zî vengdayîşê Rayberê Şarê Kurdî Abdullah Ocalanî ser o ame girewtene. PKK’yî encamnameyê kongreya xo ya 12. eşkera kerd û şehadetê di pêşang û awankaranê xo Alî Haydar Kaytan (Fûat) û Riza Altunî zî eşkera kerd.
Kaytan û Altun do 13, 14 û 15ê gulane de Tuzlaçayira Enqereyî de bêrê vîrardene.
17ê gulane de zî do Qada Seyîd Rizayî ya Dêrsimî de programê vîrardişî bêro kerdene.
18ê gulane de zî do Qada Şêx Seîdî ya Amedî de programê vîrardişî bêro organîzekerdene. Yeno zanayene ke do xeylê şaristanan de programê vîrardişî bêrê organîzekerdene. Do keyeyê Kaytan û Altûnî zî beşdarê programanê vîrardişî bibê.
