Şaredarîya Amedî ya Şaristanê Girdî çarçewaya xizmetanê şaredarîye yê zafziwanî de Merkezê Vengdayîşê ALO 153î dest bi dayîşê xizmetê kurmancî kerd.
Şaredarîya Amedî ya Şaristanê Girdî, çarçewaya fehmê şaredarîya sosyale de xebatanê xo yê Merkezê Vengdayîşê ALO 153î ke seba nirxnayîşê waştiş, pêşnîyaz û gazinanê şarî awan kerdo, dewam kena. Bi merkezê vengdayîşî yê girêdayeyê Serekîya Daîreya Çapemenî, Weşan û Têkilîyanê Şarî, her roje bi hezaran şarî rê fersend yeno dayene ke bê şîyayîşê awanîya xizmetî ya şaredarîye, waştişanê xo biresnê şaredarî. Merkezê Vengdayîşî ke heta ewro xizmetê xo bi tirkî dayo, nika do waştişan bi kurdkî zî bigîro û şarî rê firsend bido ke bi ziwanê dayîke xizmetî ra îstîfade biko.
Xizmetê şaredarîye yê zafziwanî
Sereka Daîreya Çapemenî, Weşan û Têkilîyanê Şarî Berivan Guneş ke derheqê xizmetî de malumat da, qeyd kerd ke dayîşê xizmetê şaredarîye yê zafziwanî de şarî rê gama verêne xizmetê bi Kurmancî danê û bale ant ke do ameyoxî de seba dayîşê xizmetê bi Zazakî, Îngilîzkî û Erebkî zî xebatanê xo biramê. Guneş va: “Şarê ma kam ziwanî de wazeno xizmet bigîro, şêno xo wina biresno ma.”
‘Şarê ma do bieşko xo bi ziwanê dayîke bi asanî îfade biko’
Guneş ke dîyar kerd ke amancê nê xebatan o verên o yo ke şar bieşko xo bi ziwanê dayîke bi asanî îfade biko, qiseykerdişê xo wina dewam kerd: “Ma Kurmancî rê rayîr akerd. Eynî wext de seba xizmetdayîşê turîstanê ke yenê bajar, demê ameyoxî de ma do bi Îngilîzkî û Erebkî zî xizmet bidê. Ma do seba turîst û şaro ke bajar de ciwîyeno, ziwanê înan de ke xo rind îfade kenê, nê warî de xebatanê xo biramê.”
