Duran Kalkano ke Kongreya 12. ya PKK’yî de qisey kerdo pare kerd ke bê ke vizêr de bimanê, bi vînayîşê neweyî, bi fedakarî û cesaretêkê pîlî verê xo bidê êyê neweyî û vat: “Ma serkewtişê prosesê komelê demokratîk û haştîye bîyarê ca.”
Ronayoxanê PKK’yî ra Duran Kalkanî derheqê Kongreya 12. ya PKK’yî de Medya Haber TV’yî rê ercnayîşî kerdî.
Ercnayîşê Kalkanî wina yê:
“Kongreya ma de birê tarîxîyî gêrîyayî. Na kongre dewrêko newe akerd. Rayraşîyayîşê azadîye de dewrê PKK’yî qedîya, dewrêko newe dîya destpêkerdene. Rayber Apoyî no dewr sey ‘Komelê Demokratîkî û Haştîye’ pênase kerd. Yanî ma kewtî dewrêkê têkoşînî yê neweyî.
Planê Çokdayîşî ame binvistene. Netîceya têkoşînê des serran de ma resayê nê rojan. Komara Tirkîya zî fam kerd ke hinî bi polîtîkayanê înkar û îmha nêeşkena kurdan çin bikera. Serekê MHP’yî Bahçelîyî venga Rayber Apoyî da, dima Omer Ocalanî Rayber Apoyî de pêvînayîş kerd. Rayber Apoyî zî vat ke eke firsend bidîyo o do zemînê şîdetî çin bikero.
Dima Heyetê Îmraliyî yê DEM Partî kewt dewre. Axir Rayber Apoyî 27ê sibate de Vengdayîşê Haştîye û Komelê Demokratîkî kerd. Rayber Apoyî ma rê mektube şawite û armancî eşkera kerdî. Ma zî cewab da mektube. 1ê adare de hêzanê ma adirbirnayîş îlan kerd.
Dima kongreya ma ameye pêser û tede birê tarîxîyî gêrîyayî. Tîya de ganî ma vajê; nê birî bi îradeyê Rayber Apoyî ameyî girewtene û caardişê nînan bi îdareyê Rayber Apoyî do bibo. Ma do biranê kongre bi hîra rayaumûmîye rê eşkera bikerê.
Ganî bizanîyo ke PKK sebeb ney netîce bi. Peymana Lozanî û ronîyayîşê Komara Tirkîya ra dima qirkerdişê vera kurdan dest pêkerd, Kurdîstan ame parçekerdene. PKK sey têgêrayîşê xoverdayîşî vejîya werte. Ma hinî naye zî fam kerd ke vurîyayîş ganî Tirkîya de dest pêbikero. Ganî Komara Tirkîya verê kurdan de paradîgmaya xo bivurna. Kurdî Tirkîya ra dewletêke ney heqanê xo wazenê.
Embaz Fuatî seba Hemleya 15ê Tebaxe Rayber Apoyî rê vatibi ke ‘To fermanê qetilkerdişê kurdan dirna, eşt.’ Yanî PKK’yî komel gandar kerd. Nê hetî ra zî erkê xo temam kerd. Rayber Apoyî 1994 de vat ‘Ganîbîyayîş temam o, dore dora felate ya.’ 1998 de î ma adirbirnayîş îlan kerdibi. Welhasil heta nika sabotajî zaf bîyî. Aseno ke xîretê sabotajî do dewam bikerê. La ma zî hîna bi baldarî têbigêrê.
PKK’yî 47 serran de têkoşîn vist dewre. PKK’yî rolê xo yê tarîxî ardî ca. Na partîye de her kes tewrê Rayber apoyî bîyo. Rayber Apoyî heta nika çew xelet nêvet. Na kongre zî bi îradeyê ey têgêraye. Rayber Apo rixmê her çîyî zî 52 serrî yo payan ser de yo.
Pêro kongreyê ma wayîrê yew mana bîyî. Her kongreya ma yew îrade, mudaxele û xelisîyayîş bîye. Kongreya 12ine zî kongreya peynîkerdişê têkoşînê 47 serran û destpêkerdişê dewrê neweyî ya. Rayber Apoyî no proses sey ‘Komelê Demokratîk û Haştîye’ pênase kerd. Paradîgmaya nê dewrî zî paradîgmaya komelê demokratîkî, azadîgîra cinîyan û ekolojîk a.
Nika ma mîyanê têkoşînê komelê demokratîkî de yê. Heta nika têkoşînî ganîbîyayîşê kurdan û estbîyayîşê kurdan armanc kerdêne. Nika ra pey no têkoşîn do komelê demokratîkî armanc bikero.
Naye ra pey ma do bivînê ke dewlete do se bikera, senî bikera. Ma zî do rêxistinîya xo rê dewam bikerê. Eke hêrişî bêrê kerdene xora ma do cewab bidê înan. Wa her kes amade bibo ke her çî fam bikero, têkoşînê caardişê komelê demokratîkî bikero.
PKK’yî 47 serran de erjê pîlî afernayî. Xora ma do nînan bipawê. Ma do tedbîranê xo bigêrê. Eke Tirkîya paradîgmaya xo ya dişmenîya kurdan nêvurna o çax ancî do bikewa mîyanê şerî yan zî teslîm biba. Eke Tirkîya nêwazena bin bikewa o çax ganî paradîgmaya Rayber Apoyî bîyara ca.
Yanî PKK xo fesh keno la çew nêvajo ke kurdî zî qedîyenê. Tena têkoşîno çekdar yanî metodê têkoşînî do bêro vurnayene. Têkoşînê seba demokrasî û azadîye do dewam bikero.
Ez bi xo tewrê PKK’yî nêbîya, ez tewrê Rayber Apoyî bîya. Mi ey de têkoşîn şinasna û mîyanê PKK’yî de cagirewt. Partîye ma perwerde kerdî. PKK’yî zî hişmendîyêka pîle viraşte. Na hişmendîye kongreya 12. kerde. PKK nasnameyêk o. PKK şar o, şar PKK yo.
Hinî naye ra pey proseso ke Rayber Apoyî dayo destpêkerdnee, ma ey ser o tewrê xebatan bibê. Birê kongre hetê cinî, ciwan, embaz û hemrayan ra bi coşî ameyî pêşwazîkerdene.
Xora ganî ma vizêrî ra dersanê xo bigêrê, heman xeletîyan mekerê. Bê ke vizêr de bimanê, ma bi vînayîşê neweyî, bi fedakarî û cesaretêkê pîlî xeta Rayber Apoyî de verê xo bidê êyê neweyî. Ma serkewtişê prosesê komelê demokratîk û haştîye bîyarê ca.
Ez naye ser o venga her kesî dana ke erk û mesuldarîyanê xo yê nê prosesî bîyarê ca. Ez nê prosesê caardişê haştîye û komelê demokratîkî de her kesî rê serkewtiş wazena.”
