Hemserekê Pêroyî yê DBP’yî Keskîn Bayindirî îfade kerd ke seba ke proses aver şêro ganî dewlete gamanê şênberan bierza û vat: “Lazimtîya ewile ganî rêzdar Ocalan bi hewayêko azad prosesî aver bero.”
Rayberê Şarê Kurdî Abdullah Ocalanî 27ê sibate de vengdayîşo tarîxî yê “Aştî û Komelo Demokratîk” kerd. Vengdayîşê Abdullah Ocalanî ra pey Partîya Karkeranê Kurdîstan (PKK) 12ê gulane de encamê kongreya xo eşkera kerd û dîyar kerd ke xo fesih kerdo. Eşkerakerdişî ra pey Kurdîstan, Tirkîya û dinya de nîqaşî dewam kenê. Dima ke PKK’yî xo fesih kerd, çimê raya pêroyî ya Kurdîstanî zî hukmatê Tirkîya de yo ke gamanê şênberan bierzo. Hemserekê Pêroyî yê Partîya Herêmanê Demokratîk (DBP) Keskîn Bayindir derheqê prosesî de ajansê ma rê qisey kerd.
‘Ganî şarê Kurdîstan û Tirkîyayî wayîrê prosesî vejîyê’
Keskîn Bayindir îfade kerd ke seba ke proses encam bigîro, bar keweno milê sîyaseto demokratîk ser o û wina vat: “Seba ke aramî Kurdîstan û Rojhelato Mîyanênî de aver şêro, berpirsîyarîyêka pîle û tarîxî milanê ma ser o yo. Bar tena mîlê partîyanê sîyasî ser o nîyo. Hêzo tewr pîl ê prosesî şarê Kurdîstan û Tirkîyayî yo. Seba ke no proses rastî saboteyî nêro, hêzo tewr pîl şar o.”
‘Ganî dewlete gamanê şênberan bierza’
Keskîn Bayindirî waşt ke dewlete gamanê şênberan bierza û wina domna: “Heta nika hemverê qerarê kongreya PKK’yî û prosesî ma eşkenê qiseykerdişanê îqtîdarî pozîtîf bierjnê. La êdî şarê kurdî û şarê Tirkîyayî yê ke aştî wazenê, gamanê şênberan wazenê. Ganî dewlete zî gamanê şênberan bierza. Ganî bi lez gamê pozîtîfî yê qanûnî bêrê eştene. Her kes vano ganî dewlete gamanê qanûnîyan bierza. Seba ke mîyanê komelî de bawerîya aştî biba û şar wayîrê prosesî vejîyo, ganî dewlete zî gamanê şênber ê qanûnîyan bierza.”
‘Ganî azadiya fizîkî ya Abdullah Ocalanî bêra ca’
Dewamê qiseykerdişê xo de Keskîn Bayindirî dîyar kerd ke ganî sere de azadîya fîzîkî ya Rayberê Şarê Kurdî Abdullah Ocalanî bêra ca û nê çîyî vatî: “Seba ke no proses bi serkewte encam bigîro û qerarê PKK’yî bêro ca, lazimtîya ewile a ya ke Rêzdar Abdullah Ocalan pêşengîya prosesî bikero. Seba ney zî ganî şert û mercê ey ê azadîya fîzîkî baş bibê. Ganî bieşko şar, partîyê sîyasî û raya pêroyî reyde têkîlî rono. Ewro hepisxaneyan de bi hezara girewteyê sîyasî yê têkoşînê azadî û aştî kenê, est ê. Bi taybetî zî girewteyê nêweşî ganî veradîyê. Ganî berê zindanan abîyê û girewteyê sîyasî veradîyê. Reyna ganî heqê perwerdeyîya Ziwanê Kurdkî qanûno bingeyî de bêro ca. Ganî partîyê muxalîfî zî berpirsîyarîya xo bizanê û parlamentoyê Tirkîya seba qanûnanê demokratîkan bîyaro ca ganî bixebitîyo.”
‘Ma do xebatanê xo bidomnê’
Peynîya qiseykerdişê xo de Keskîn Bayindirî dîyar kerd ke sey DBP ê zî seba proses bireso encamî, do xebatanê xo bidomnê û wina vat: “Ma do mîyanê şarî de prosesî bidê fehmkerdene. Seba ke şar zî bi hewayêko xurt beşdarê prosesî bibo, ma do bixebitî. Hêzê şaranê Kurdîstan û Tirkîyayî prosesî de zaf muhîm o. Seba ke no hêz vejîyo vernî, ganî şar prosesî virar bikero. Helbet şik û gumanê ma est ê la hêvî û bawerîya ma ya seba averberdişê nê prosesî ke Rêzdar Abdullah Ocalan aver beno, est o ke no proses bi hewayêko serkewte encam bigîro.”
