Amed – Seroka Daîreya Karên Çand û Civakî ya Şaredariya Bajarê Mezin a Amedê Zeynep Yaş têkildarî helwesta li ser beyt û navê helbestvanên Kurd ku li erdê hatine bicihkirin wiha got: “Bi van xebatan ciwanên me bi zimanê xwe mezin dibin. Em ê zimanê xwe bi hev re gur û geş bikin.”
Serokatiya Daîreya Karên Çand û Civakî ya Şaredariya Bajarê Mezin a Amedê bi boneya 15ê Gulanê Cejna Zimanê Kurdî kevirên ku beyt û navê helbestvanên Kurd li ser peyarêya li Cadeya Gazî ya li navçeya Sûr a Amedê bi cih kirin. Têkildarî vê yekê rexne û daxwazên gel çêbûn. Seroka Daîreya Karên Çand û Civakî ya Şaredariya Bajarê Mezin a Amedê Zeynep Yaş ku duh têkildarî mijarê li eywaneke Çand Amedê daxuyanî da, derbarê rexne û daxwazên gel ji ajansa me re axivî.
‘Em ê li zimanê xwe xwedî derkevin’
Zeynep Yaş da zanîn ku armanca wan ew e ku weke zimanê axaftinê zimanê nivîskî yê kurdî jî li nav civakê geştir bibe û wiha got: “Ne tenê 15ê Gulanê, 21ê Sibatê û beriya wê jî dema şaredariyên me hatin ser kar, yek ji dirûşma me ya herî mezin bû ku em ê li zimanê xwe xwedî derkevin. Zimanê me dê di nava gel de bibe zimanekî asayî û rojane ku gel zimanê xwe biaxive û dan û stendin û hemû karen xwe bi zimanê xwe pêk bîne.”
‘Helwesta gelê me ji bo me rêzanî ye’
Zeynep Yaş, destnîşan kir ku mafekî rewa ye ku gelek bi zimanê xwe bixwîne û binivîse û wiha domand: “Bi vê mebestê me weke Daîreya Karên Çand û Civakî û Midûriyeta Beşa Ziman weke bajarekî pir çandî û zimanî em hewldanekê dikin ku ev bajar li nasnameya xwe ya çandî û dîrokî vegere û ev weke mîrateyekê di nava gel de geş bibe. Di heman demî de têkiliyên gel ên bi hevdû re xweş bibin. Ev hewldan ji bo vê yeke ye. Helwesta gelê me ji bo me rêzanî ye. Ew daxwazên wan ji bo me rênîşander in ku em bêtir daxwazên wan li ber çavan bigirin. Ev rûmetên me yên nivîskî ne ku ji bo gel pê lê bike ji bo ku gel lê bisekine û bizanin alimên wan, zanayên wan beriya sed salan, pêncsed salan, hezar salan çi gotine, çawa jiyane, çi fikirî ne me bi cih kirin. Ji bo ku kêliyek be jî bêyî ku gava xwe biavêje lê bisekine, biçek be jî bi bîr bîne. Ji ber mixabin nifşên me yên nû ji xwendin û nivîsandinê jî dûr dikevin. Li hember teknolojiye çanda me ber bi têkçûnê ve diçe. Hemû çandên dinyayê di bin xetereyê de ne. Lê bi van xebatan bi hişyarkirin û hişmendiya zimanî ciwanên me, pêşerojên me bi zimanê xwe mezin bibin. Em nirxandinên gel ji bo xwe birûmet dibînin, rêzdarî dibînin. Em ê zimanê xwe bi hev re gur û geş bikin.”
‘Hemû daxwazên gelê me ji bo me ferman in’
Zeynep Yaş, da zanîn ku hemû pêşniyarên gel ji bo wan ferman in û ev tişt gotin: “Hemû daxwazên gelê me ji bo me ferman û rênîşander in. Bêguman em ê daxwazên wan li ber çavan bigirin. Çawa ku em ê bikarin vî zimanî gur û geştir bikin em ê bi gel re di nava dan stendinê de bin.”
