Tehlîyeya 5 girewteyan ke Hepisxaneyê Cinîyan ê Sîncanî de manenê, hetê Heyetê Îdarî û Muşahadeyî ra bi hewayêko sîstematîk û bi bahaneyanê keyfî yena astengkerdene.
Girewteyê bi nameyî Nedîme Yaklav, Gulşan Adet, Nurîye Adet, Zelîha Usta Baş û Şermîn Demîrdag yê ke lîsteya girewteyanê nêweş ê Komela Heqanê Merdiman (ÎHD) de yê û zafaneyê înan 30 serrî yo girewte yê, tehlîyeya înan hetê Heyetê Îdarî û Muşahadeyî ra bi hewayêko sîstematîk û bi bahaneyanê keyfî yena astengkerdene.
Heyet mekanîzmaya zuran ser o xebitîyeno
Nedîme Yaklav a ke Hepisxaneyê Cinîyan ê Sîncanî de girewte ya, 1994î de ameye destbendkerdene û dima bi îdiaya ‘yewîya dewlete herimnaya’ cezaya bêpeynî ci rê ameye dayene. Nedîme Yaklav rixmo ke 1ê nîsana 2023î de înfazê aye temam bîyo zî hetê Heyetê Îdarî û Muşahadeyî ra tehlîyeya aye ya bi şerte di reyî 3 aşmî, di reyî 6 aşmî û 9 aşmî bi pêroyî 5 reyî ameye taloqkerdene. Nedîme Yaklav erjnayîşo hîrêyinî de waşt ke dozger zî erjnayîşî de ca bigîro la reyna zî nêame qebulkerdene.
Di reyî înfazê Zehra Ustabaş ame taloqkerdene
Zehra Ustabaş zî 24ê temmuza 2024î de rixmê înfazê cezaya aye temam bi zî tehlîyeya aye ya bi şerte 18ê hezîrana 2024î de reyêk, bi pêroyî di reyî tehlîyeya aye ameye astengkerdene. Tehlîyekerdişê aye hetê Heyetê Îdarî û Muşahadeyî ra bi bahaneyê keyfî yê sey ‘seba beşdarbîyayîşê komelî amade nîya’ yena astengkerdene.
Qerarê keyfî yê ÎGK’yî huqûqî ra dûrî yê
Nurîye Adest zî ê cinîyan ra yew a ke înfazê aye di reyî ameyo taloqkerdene. 29ê çeleya 2024î de hîrê aşmî, 23ê gulanan 2024î de zî 6 aşmî, bi pêroyî di reyî tehlîyeya aye ameye astengkerdene. Heyetî înfazê Nurîye Adet zî bi bahaneyo sey ‘seba beşdarbîyayîşê komelî amade nîya’ taloq kerd.
Tahliyeya Sermîn Demîrdag 6 reyî ya Gulşan Adet 2 reyî ameye astengkerdene
Înfazê girewteya bi nameyê Gulşan Adet 21ê adara 20243i de hîrê aşmî, 18ê hezîrana 2024î de zî 6 aşmî, bi pêroyî di reyî ameye astengkerdene. Ya Şermîn Demîrdag zî 23ê çeleya 2023î de di reyî her reye hîrê şamî, hîrê reyî zî her reye 6 aşmî û dima ra zî 9 aşmî, bi pêroyî 6 reyî ameye taloqkerdene. Nê kerdişê keyfîyî Hepisxaneyê Cinîyan ê Sîncanî de bi hewayêko sîstematîk yenê kerdene.
