TJA’yî venga beşdarbîyayîşê rayîrşîyayîşo ke do 31ê gulane de Amed de bi beşdarîya bi hezaran cinîyan bêro kerdiş, kerd.
Têgêrayîşê Cinîyanê Azadan (TJA) derheqê rayîrşîyayîşo ke do hetê bi hezaran cinîyan ra 31ê gulane de saete 16:00î de Meydanê Şêx Seîdî yê Amedî de bêro organîzekerdiş, vengdayîşêko nuştekî pare kerd.
Eşkerayîya bi sernameyê “Cinî semedê aştîya komelkî û çareserîya demokratîke rayra şonê” de ame vatiş ke ‘Ma cinîyî ke semedê cuyêka bêşere, bêîstîsmar, cuyêka têduşt û biedaletî têkoşîn danê, merkezê awankerdişê çareserîya demokratîke ya meseleya kurdî yê.”
TJA’yî eşkerayîya xo de wina va:
“Dimayê vengdayîşê Birêz Ocalanî yê 27ê sibate berê aştîyêka birûmet welatê ma de abîyê. Ma cinî do nê vengdayîşî tewr zêde qebûl bikerê û komelêko demokratîk awan bikerê.
Semedê cuyêka azad û têduşte
Ma zanî ke komelê demokratîkî cuyêka sosyalîst ê têduştî û azad o. Ma awankerdoxê na cuye yê. Nê semedî ra; ma semedê aştîya komelkî û çareserîya demokratîkî rayra şonê! Ma venga pêro çalakîkeranê cinî, femînîst, ekolojîst, cinîyê ciwanî, roşnvîr û hunermendê ke pawitoxê heqî yê, cinîyî ke netewe û bawerîyê înan cîya yê, kenê ke semedê pawitişê cuyêka azad û têduştî beşdarê ma bibê.
Vengdayîşê tewrbîyayîşê rayîrşîyayîşî
Ma zanî ke cinî hêzê agêrayîşê cuye yê. Ma zanî ke komelî nêeşkenê azad bibê heta ke cinî azad nêbê. Ma zanî ke her çî eşkeno bibo, eke ma biwazê. Bêrê ma pêro 31ê gulane de saete 16:00î de Meydanê Şêx Seîdî yê Amedî de sozê xo yê komelê demokratîkî berz bikerê.”
