Parlamentera verî Gulîstan Seîd da zanayene ke badê cigêrayîşê pasaportê înan ser o, Tirkîya nêverdayo ê Amed de beşdarê konferansî bibê.
Konferansê Parlamenteranê Cinîyan ê Kurdan yo 1. ke bi rayberîya Têgêrayîşê Cinîyan ê Azadan (TJA) Amed de yeno organîzekerdene, do di rojan dewam bikero.
Cinîyan ra yew ke do beşdarê konferansî bibîyêne û waştêne vîyara Bakûrê Kurdîstanî, parlamentera verêne ya Parlamentoyê Herêma Federe ya Kurdîstanî Gulîstan Seîd bîye.
Gulîstan Seîd hesabê xo yê X’î ser o eşkera kerd ke Tirkîya nêverdayo a vîyara Bakûrê Kurdîstanî û beşdarê konferansê Amedî biba.
Gulîstan mesajê xo de wina vat: “Vizêr seba ke ma beşdarê konferansê Amedî yê Bakûrê Kurdîstanî bibî kewtî rayîr, la badê cigêrayîşê pasaportî nêverda ma vîyarê. Uca de ez, Nesrîn Cemal û embaza ma ya bîne bi nameyê Gulale nêzdî di saetan ameyê destbenkerde.
Dima ma ra vat ke bi fermanê Anqara şima nêeşkenê çiray Bakûrê Kurdîstanî zîyaret bikerê, dima ma zî agêrayê Başûrê Kurdîstanî.”
Gulîstan dewama mesajê xo de va: “Riyê rejîmêko zordar û nijadperest ke qet eleqeya xo bi heqanê însanan çin a, do tu wext hêz û îradeyê ma ser o tesîr nêkero. Kotî de bo ma do piştgirîya şarê xo û welatê xo bikerê.”
