Denîz Poyraze serrgêra qetilkerdişê xo de Îzmîr de bi rayraşîyayîş û panelî ameye yadkerdene û veng dîya ke cînayetê sîyasîyî bêceza nêmanê.
Denîz Poyraze 17ê hezîrana 2021î de hêrişê vera bînaya HDP’yî ya Îzmîrî de amebî qetilkerdene. Denîz Poyraze serrgêra qetilkerdişê xo de Îzmîr de bi rayraşîyayîş û panelî ameye yadkerdene.
Panelê “Denîz Poyraze û Têrîbîyayîşê Cînayetanê Sîyasîyan” Merkezê Kulturî yê Turkane Saylan de ame kerdene û bale ante sîyasetê teda û bêcezaverdayîşî ser. Keyeyê Denîz Poyraze, temsîlkarê partîyan û rêxistinanê komelê sivîlî û xeylê kesî beşdarê panelî bîyî. Panel de Wekîla DEM Partî Adalet Kaya û avûkat Turkan Aslane qisey kerd.
Avûkat Turkan Aslane dîyar kerd ke prosesê tehqîqatî bi tesîrî nêameyo kerdene. Turkan Aslane têkilîyê kiştoxan a bi paramîlîteran viste vîrî. Turkan Aslane bale ante Vengdayîşê Haştîye û Komelê Demokratîkî yê Rayber Apoyî ser û vat ke ganî her kes wayîrê nê vengdayîşî vejîyo.
Adalet Kayaye zî vist vîrî ke cînayetê sey Denîz Poyraze hetê hêzanê tarîyan ra ameyê kerdene û ganî nê cînayetan de dewlete têrî biba û polîtîkayanê bêcezaverdayîşî ra fek vera bida.
Dima eşkerayîya çapemenîye ameye dayene. Eşkerayîye de sloganê sey “Jin jîyan azadî” û “Şehîd namirin’ ameyî vatene.
Hemsereka DEM Partî Fulya Erdogane cînayetê vera Denîz Poyraze suîkastêko plankerde û sîyasî bîyo. Fulya vat: “Ma do xeyalanê Denîz Poyraze bîyarê ca.”
Dima girsetî ver bi Meydanê Gundogduyî rayraşîyayîş kerd û qeranfîlî eştî dengizî.
