Îran û Îsraîlî şewe zî hêrişê yewbînan rê dewam kerd. Tewr tay 60 teyareyanê Îsraîlî Tehran de da hedefanê leşkerîyan ê Tehranî ro. Îsraîl de zî şaristanê Be’er Sheva bi hedef, 7 kesî birîndar bîyî.
Goreyê medyaya Îsraîlî tewr tay 60 teyarayanê Îsraîlî şewe dayo merkezanê leşkerîyan ê Îranî ro. Nînan ra yew zî merkezê SPND’yî bi ke merkezê cigêrayîşê çekanê nukleeran o.
Artêşa Îsraîlî dîyar kerd ke înan dayo hîrê hacetanê fuzeyanê Îranî ro û înan dayo fermandarêkê Îranî ro.
Hêrişan ra dima dû kewt serê tax Lavîzanî ya Tehranî. Goreyê Îran Internationalî tîya de stargehê lîderê Îranî Alî Hamaney û keyeyê ci manenê.
Goreyê xeberanê Îsraîlî hêrişanê Îranî de qasê 30 kesî birîndar bîyî.
Serekwezîrê Îsraîlî Binyamîn Netanyahuyî roja pancşemeyî eşkerayîyêke daye û pare kerd ke ‘nêmeyê ci ra zafêr’ hacetê fuzeyan ê Îranî ameyê îmhakerdene.
Goreyê medyaya Îranî Îsraîl amadekarîye keno ke bi beşdarîya Amerîka do bido santralê nuklerî yê Fordoyî ro.
Medyaya Îsraîlî pare kerd ke Trump beno ke mîyanê di yan zî hîrê rojanê bînan de têbigêro, tewrê şerî bibo. Trumpî dîyar kerd ke ê do mîyanê di hewteyan de bire bidê ke Amerîka tewrê şerî biba yan ney.
