Zafê derûdorî bawer kenê ke şerê Îsraîlî yo ke Lubnan de vera Hîzbullahî rayra beno, seba vindarnayîşê şerê mabênê Îran û Amerîka meseleya bingeyên o. Yeno pawitene ke Îsraîl û Lubnan ewro Washington de rasterast bêrê têhet û na babete ser o qisey bikerê.
Serekê Amerîka Donald Trump, şewa bîne hesabê xo yê Truth Social ser o eşkera kerd ke lîderê Îsraîl û Lubnanî ewro do pêvînayîşêko rasterast bikê. Na gama dîplomatîke, seba kêmkerdişê tansîyonê herême û viraştişê “aramîya” mabênê her di welatan zaf muhîm yena vînayene.
Mizgîniya Trumpî ya Truth Social de
Donald Trumpî diyar kerd ke wextêko zaf derg o ke lîderê her di welatan yewbînan de qisey nêkerdo û wina va: “Ma cehd kenê ke mabênê Îsraîl û Lubnanî de biney aramî virazê. Nêzdîyê 34 serrî yo ke lîderê her di welatan yewbînan de qisey nêkerdo. No pêvînayîş ewro do pê bêro. Zaf weş o!”
Kabîneyê Asayîşî yê Îsraîlî de pênêameyîş
Kabîneyê Asayîşî yê Îsraîlî zî seba munaqeşakerdişê adirbestê Lubnanî kom bi. Goreyê agahîyan, kabîneyê Netanyahu şeklê vindarnayîşê şerî de heta nika nêresayo pênêkerdo. Rixmê nê nakokîyanê zereyî zî, Trump bi na gama dîplomatîke cehd keno ke berêko newe akero.
Prosesê dîplomasî û şerê meydanî
No pêvînayîşo ke badê desan serran virazîyeno, wextêko winasîn de yê ke serê sînorî de şerêko giran dewam keno. Pisporê polîtîkî vanê ke Washington cehd keno bi nê pêvînayîşî vernîya xirabbîyayîşê şerî bigîro û têkilîyê dîplomatîkî yê ke serra 1990î ra nat birîyabî, reyna awan bikero.
