Komela Rojnamegeran a Dîcle Firatî raporê aşma hezîrane eşkera kerd. Goreyê raporê DFG’yî aşma hezîrane de 26 rojnamegerî ameyî muhakemekerdêne û vera rojnamegeran teda zî her ke şono zêdeyêr beno.
Komela Rojmageran a Dîcle Firatî (DFG) ke her aşme rapor eşkera kena, raporê aşma hezîrane eşkera kerd. DFG’yî raporê xo de va ke aşma hezîrane de zî hêriş û teda çapemenî ser o ameyê kerdene û rapor de wina vat: “Ma aşmêka bîn zî bi binpêkerdişê heqan û hêrişan peyê xo de verday. Îqtîdarê AKP’yî hetêk ra vatişanê ‘demokratîkbîyayîşî’ keno, hetêk ra zî zidê demokratîkbîyayîşî hêriş û teda çapemenî ser o keno. Na aşme de heqê rojnamegeran ameyê binpaykerdiş. Hêrişo ke vera Kovara LeManî ame kerdene zî berdewamîya nê hêrişanê sîstematîkî ya.”
Çeteyê Fuhuşî tehdît kerd
DFG’yî da zanayene ke aşma hezîrane de 16 rojnamegerî ameyê destbendkerdene û 6 rojnamegerî zî ameyî girewtene û wina domna: “3ê hezîrane de edîtora Bîanetî Tugçe Yilmaz, bi manayê nuqtaya 301. bi hewayêko nehiqûqî ameye destbendkerdiş. 13ê hezîrane de zî rojnameger Eylem Emek Yilmaz, Ozan Cirik, Yavuz Akengîn û Dîcle Baştur ameyê destbendkerdene û bi manayê ke sazî û dezgeyanê teberê welatî rê xeberî viraştê, ameyê girewtene. 21ê hezîrane de zî rojnameger Fatîh Altayli ame girewtene, bi girewtişê 6 rojnamegeran zî hûmara rojnamegeranê girewteyan bîye 34. Roja peyêne ya aşma hezîrane de komêk dînperest bi manayê karîkaturî ke Kovara LeManî de weşanîyayo, hêrişê ofîsî kerd û xesar da ofîsî. Muxabîra Ajansê Mezopotamyayî Zeynep Durgute Şirnex de xebera ‘Çeteyê Fuhuşî’ viraştbî. Kesanê ke xeber înan eciz kerdbî, Zeynep Durgute gêrayî û aye tehdît kerde. No zî berdewamîya politikaya bêcezaverdayîşî ya.”
Ma do bi rolê xo bibî pêşeng
DFG’yî tewr peynî bal ant tedayanê çapemenîye ser o û wina qedêna: “Hêriş û tedayê çapemenîye ser o zêdîyenê. Vera nê hêrişan ma têkoşîno hembar avzel vînenê û ma do têkoşînê heqîqetî bidomnê. Her wina ma do awankerdişê komelê demokratîkî de zî bi rolê xo bibê pêşeng.”
