Komela Rojnamegeranê Dîcle Firatî (DFG) bi munasebetê 3ê Gulane Roja Pêroyî ya Azadîya Çapemenîye eşkerayîyêk weşanaye û dîyar kerd ke neheqîyê vera rojnamegeran 3 aşmanê verênan ê 2026î de bîyê “rejîmêkê sîstematîk ê tedayan.”
DFG’yî dîyar kerd ke goreyê zanayîşan, çeleyê 2026î de 14 rojnamegerî ameyî destbendkerdene, 1 rojnameger ame tepîştene û astengê pawitişê xeberan vera 22 rojnamegeran ameyo kerdene. Sibata 2026î de 6 rojnamegerî rastê hêrişî ameyî, 11 rojnamegerî ameyî destbendkerdene û 5 rojnamegerî ameyî tepîştene. Adare de 5 rojnamegerî ameyî destbendkerdene û 2 rojnamegerî ameyî tepîştene.
Eşkerayîye de ame dîyarkerdene ke muhakemeyê vera rojnamegeran zî dewam kenê. 3 aşmanê verênan de bi desan rojnamegerî ameyî muhakemakerdene, zaf dosyayî dewam kenê û cezayê hepsî ameyî dayene. Sewbîna caardişê sansûranê sey qefilnayîşê keyepelanê înternetî, astengê resayîşê xeberan û birnayîşê tedeyîyan medyaya komelkî hîra bîyî.
Eşkerayîye de ame vatene: “Nê zanayîşê 3 aşmanê verênan ê 2026î mojnenê ke azadîya çapemenîye yê Tirkîya tena hetê huqûqî ra ney, eynî wext de bi fîzîkî, dîjîtal û ekonomîk zî binê dorpêçî de ya.”
