Alan Mistefa, yew ciwanêko zend-hunerin ê herêma Behdînanî yo ke pîşeya ey a ya ke daran ser o neqşan virazeno û eseranê zaf weş û balkêşan aferneno. Derheqê karê xo de vano: “Hema domanîya mi de zî mi nê karî ra hez kerdêne û xeyalê mi o bi ke ez bimusa.”
Hunerê neqşkerdişê daran, huneran ra yew o ke zaf balkêş o û hetê şarî ra seba eseranê na pîşe telebêko avzel est o. No hunero kehen, bi destê ciwanêkê herêma Duhokî yeno averberdene û ganî tepiştene. No ciwan daran ser o neqşan virazeno û bi resmanê balkêşan daran ser o neqşneno.
Alan Mistefa, qezaya Amedîye ya Herêma Duhokî ra yo. Alan Mistefa ke beşdarê yew dewre (kurs) bibo ya zî yew mamosta ra derheqê na pîşe de melumat bigêro, YouTube ser o neqşkerdene, resimviraştene û dizaynê serê daran museno. Alan na pîşeya xo de bêmabên eseranê zaf balkêş û rindekan virazeno.
Ez na pîşe musaya
Alan Mistefa derheqê hunerê xo yê neqşkerdişê daran de wina va: “Hema wextê domanîya mi de heskerdişê mi seba na pîşe estbi. Labelê çi heyf herêma ma de tu dewre û mamostayî çinêbî ke na pîşe bi hawayêko profesyonel ma rê bido musnayîş. Coka ez mecbur menda ke elaqaya xo bida YouTube’î û hetê ey ra ez na pîşe musaya. Nika çarçoveyê hunerê xo yê neqşkerdişê daran de, ez kelmelê zereyê keyeyî (malê), çîyanê werdene û şimitene yê textênan neqşnena û hem zî karê dekorî zî kena. Nê eseranê ke ez virazena zî, hetê onlineyî ra roşena. Yew çîyo bîno muhîm nê hunerê neqşkerdişê daran de esto ke o zî no yo ke gereka verî ke ti dest pê neqşkerdişê dare bikerî, yew fikir xeyalanê to de bo û ti o fikirî vîyarnî serê dare. Çunke tena yew heqê to esto ke ti dareke ser o na neqşe bivrazî, dima ti nêeşkenî yew neqşo cîya ya dare ser o virazî.”
