Şarê qezaya Til Brakî semedê germîya hamnanî ya xidare, îmkananê kêman û xirabîyayîşê binesazîye ra, tedarîkkerdişê awa şimitişî de zehmetîyê girdî anceno la bi îmkananê kêman zî tedarîkkerdişê awe dewam kenê.
Bi ameyîşê hamnanî û berzbîyayîşê pîleyanê germîye, îhtîyacîya awa şimitişî qezaya Til Brakî ya Kantonê Cizîrê yê Vakur û Rojhelatê Sûrîye de bena di qat. No zî zehmetîyanê ke Mudirîya Awe ya Şaredarîya Şarî pê rî bi rî ya, zêdeneno, bi taybetî semedê îmkananê kêman, kêmîya ceyranî, herabîyayîşê şaristanan û destdergîya serê xetanê awe.
Stasyonê Til Azanî çimeyê sereke yê awe yo
Qeza zafane xo resnena stasyonê awe yê Til Azanî ser ke o zî rojawanê Til Brakî de yo. Uca heşt bîrê xorî est ê û bi rayîrê şebekeyêkê borîyan o hîra awe danê qeza û herêmanê dormeyî. Ancîna bîrê awe seba kerdene-purrî ya depoyanê awe yê ke dewanê dûrîyan û cayanê ke şebekeyê awe xizmet nêdano înan, yenê şuxulnayene.
Goreyê serekê beşê awe yê Şaredarîya Şarî ya Til Brakî Ednan Mihemedî, stasyon rasterast awe dano zêdeyêrê 34 tax û dewan, her wina 104 dewanê başûr û rojawanî rê zî, bi rayîrê tankeranê awe yê şaredarîye awe resneno înan.
Ednan Mihemedî da zanayîşke tîma lezûbezî ya beşê awe şew û roj gureyena, seba tamîrkerdişî lezûbez tedbîran gêna û tedarîkkerdişê awe, bi taybetî aşmanê hamnanî de, garantî kena.
