Colemêrga ke bi awe û hênîyanê xo yena naskerdene, no nêzdîyê di aşmî yo problemê awe yeno vînayene. Welatîyî ke rîyê awa lêl û lêmine ra bêçare manenê ke awa şimitişî bi pereyan biherînê, dîyar kerd ke na rewşe weşîya kena kena tehluke.
Colemêrg de rîyê vewra zafe ra çem û hênî pirr ê û her ca şîn o. La çi heyf ke mîyanê na zengînîye de welatîyê Colemêrgî nêeşkenê awa şebekeyî ya pake bişimê. Girewtişê awa pake heqêko bingeyîn o û rayberîyê herêmî bi peydakerdişê awe reyde wezîfedar ê. Sewbîna awa şimitişî ya lêle û lêmine, seba weşîya welatîyan tehluke ya. Reyna rîyê awa lêmine ra welatî bêçare manenê ke awe bi pere biherînê.
‘Hukmat, partîyanê sîyasî û risîpîyan Colemêrgî tena verda’
Welatî Hebîp Memetogluyî dîyar kerd ke Colemêrg bi serran o bêwayîr ameyo verdayene û wina vat: “Çem, awe û hênîyê Colemêrgî hende zaf ê ke şaristananê sey Stenbolî rê zî qêm kenê. Labelê çi heyf ke ewro ma seba awe şonê hênîyanê teberî, şonê serê çeman û çiranê zozanan ke seba xo awe bîyarê merkezê şaristanî. Colemêrg hetê hukmat, partîyanê sîyasîyan û risipîyan ra bêwayîr ameyo verdayene. Awa ke nika herikîyena, lêl a û dol û zozanan ra bi şeklêko lêmin herikîyena, weşîya şarî fînena tehluke. Eke wina dewam bikero, mîyanê des rojan de şar heme do nêweş bikewo. Çareserkerdişê na mesela bi mesrefanê girsan nê, bi wayîrvejîyayîş û xebatan mumkin o.”
‘Awa Colemêrgî kêm bîya û a ke est ê zî lêmin ê’
Welati Sadullah Besî bal ant problemanê îdare û zehmetîyanê peydekerdişê awa pak ser o û wina vat: “Awa Colemêrgî kêm bîya û a ke est ê zî lêmin a. Şaredarî destê qeyûmî de ya û o zî şarê Colemêrgî nêşinasneno. Ma nêzanenê qandê çareserkerdişê nê meseleyî şêrê hetê kam û kamca ra muracat bikerê. Awa lêmine ya ke herêmanê dewan ra herikîyena, tewrê awa şimitişî bena û hênîyanê şaristanî lêmin kenê. Ma bêçare manenê ke awa şimitişî bi pereyan teber ra biherînê.”
Colemêrga ke warê hênîyan a labelê awe çin a
Huseyîn Apaydinî zî da zanayene ke mîyanê hende çimeyanê awe de estbîyayîşê problemê awa pakw nakokîyêka girse ya û vat: “Awe hema vaje qet nêyena. Wexto ke yena zî problemê ci zaf ê. Colemêrg bi hênîyanê xo yê şimitişî dewlemend a û emser zî seba varan û vewre zaf zêde bi. Labelê ez nêzana çira na awe nêresena Colemêrg. Ma nêşkenê awa keyeyî bişimê, çunke her tim lêl a û lêmin a. Seba na mesela ma her tim awa xo teber ra herînenê.”
