Beyanname awanîya Reqa ya Rayberîya Xoser a Hêzê Demokratîkî yê Vakur û Rojhelatê Sûrîye ver de bi beyanatê çapemenîye ame eşkerakerdiş. Beyanato ke bi Kurdkî û Erebkî ameyo hedrekerdiş, hetê hemserekanê Rayberîya Xoser yê Îdareyê Meclîsî Evîn Siwêd û Hisên Osmanî ra ame wendiş.
Beyanname awanîya Reqa ya Rayberîya Xoser a Hêzê Demokratîkî yê Vakur û Rojhelatê Sûrîye ver de bi beyanatê çapemenîye ame eşkerakerdiş. Beyanato ke bi Kurdkî û Erebkî ameyo hedrekerdiş, hetê hemserekanê Rayberîya Xoser yê Îdareyê Meclîsî Evîn Siwêd û Hisên Osmanî ra ame wendiş.
“Awankerdişê Sûrîye de beyannameyê dîyalogê Sûrîye”
Teferruatê beyannameyî wina yê:
Orte re wedarîyayîşê rejîmê Baasîyê zordarî ra dima Sûrîye de dewrêko newe dest pêkerd. Seba ke ma bieşkê prosesî serkewte îdare bikê, ganî ma bibê yew. Seba xerîtayêka xebate ya hempare yewîye û xebatêka hempare lazim a. Polîtîkayê ke Sûrîye ver bi rijîyayîş benê, sey teberkerdiş û înkarî ganî orte ra hewanîyê. Heme hêzê sîyasî ganî awankerdişê Sûrîyeya newa de ca bigîrê. Nê bingeyî ser o ma venga heme hetanê Sûrîye danê ke nêzdîbîyayîşê înan ê hemverê yewbînan kontrol bikerê û menfaatanê netewîyan heme çîyî ra cor bitepîşê.
Bi nê bingeyî, ma hemkarîya Rayberîya Xoser a Demokratîke û îdareyê sîyasî yê Şamî, seba menfaatanê Sûrîyeyijan ca de vînenê.
Sey Rayberîya Xoser a Vakur û Rojhelatê Sûrîye ma zanê ke, heme şarê Sûrîye hemverê heme pabestîyanê xo berpirsîyar a. Seba ke ma hemverê şarê xo de berpirsîyaranê xo bîyarê ca, ma semedê awankerdişê Sûrîyeya newîye mabênê Sûrîyeyijan de beyannameyê xo yê dîyalogî eşkera kenê.
Qederê prosesî, do bi vistişî nê gaman dîyar bibo û ma venga heme hêzanê Sûrîye danê ke bi nê hususê ke de ma dîyar kerdo, bixebitîyê:
1) Pawitişê pêroyê erd û bandureyê Sûrîye, hemverê hêrîşanê dewleta tirke û cerganê aye pawitişê Sûrîye.
2) Pêroyê Sûrîye de vindarnayîşê çalakîyanê eskerîyan û seba awankerdiş û vîyartişê dîyalogê netewî.
3) Mabênê Sûrîyeyijan de ganî nêzdîbîyayîşêko weş bibo, ganî vateyê nefret û îxanetî ra dûrî vinderê. Heme şar û rengî zengînîya Sûrîye ya û na zengînîye, ganî bi esasanê demokratîkan bêra pawitiş.
4) Prosesê vîyartişî de seba yewîya fikran, ganî bi têbîyayîşê heme hêzanê Sûrîye Şam de kombîyayîşêko awarte virazîyo.
5) Prosesê sîyasî de ganî cinî aktîf ca bigîrê.
6) Çimeyê xoza û Sûrîye û serwetê aye aîdê heme şarê Sûrîye yo û ganî bi hewayêko adîl bêro parekerdiş.
7) Şarê ke cayê xo ra bi hewayêko zordar ameybî vetene, ganî seba agêrayîşê înan temînatêk bêro dayene. Mîrasê înan o kulturî ganî bipawîyo. Bedilîyayîşê polîtîkaya nufusî ganî bivindarîyo.
8) Rewşa Sûrîye ya peyêne ra dima seba ke DAÎŞ reyna nêvejîyo orte hemverê terorî de şerê ma do dewam bikero. No têkoşîn do Hêzanê Sûrîye yê Demokratîkan û Koalîsyonê Mîyannetewî reyde bibo.
9) Ganî îşxalkerîye biqedîya, şarê Sûrîye ganî bieşkîyo qederê xo tayîn bikero. Ganî metodê têkîlîyê cîranîye yê başî bêra şuxulnayene.
10) Ma venga dewletanê Ereb, Neteweyê Yewbîyaye, Koalîsyonê Mîyannetewî û heme hêzanê mîyannetewîyan danê ke seba Sûrîye bi hewayêko aktîf ca bigêrê. Ma veng danê ke fikranê şaranê Sûrîye yew bikê, paştî bidê şarê Sûrîye û nê prosesî de zemînê persayîşî akerê û rolêko aktîf bigîrê xo ser o. La ma wazenê vajê ke ganî no rol zî bi bingeyê pawitîşê ewleyîya Sûrîye bo û vernîya mudaxaleyê ver bi karanê zereyî yê Sûrîyeyî bigîro.
