Cinîyê kedkarê ke mîyanê hêgayan de germîya 45 derece de xebitîyenê înan ard ziwan ke meaşê înan çend mengan ra dima dîyayî ke no pere qîm nêkeno. Cinîyan vera sîstemê kolonyalîstî nêrazîbîyayîşê xo mojna.
Qezaya Xana Axparî ya Amedî de zî cinîyê karkerî bi 900 lîra yewmîye binê germîye de xebitîyenê. La na yewmîye ra parçeyêkî zî cinîyî danê mabênçîyanê bi nameyê ‘’çawişan.’’
Merve Alara 24 serrî ard ziwan ke dima ke aye zanîngeh qedînayo nêeşkaye karêkî bivîna coka hêga de xebitîyena. Merve vat: ‘’Ez verî zî hêgayan de xebitîyayêne. Di serrî ez hem xebitîyaya hem zî mi zanîngeh wend. Bêçaretîye ra ez agêraya nê karî. Ez bi yewmîyeyanê xo kitabanê KPSSyî bigêra. Ma her roje serê sibatî saete 5 de dest pê karî kenê û şan agêrenê keyeyê xo. Ma yewmîyeya xo ya 900 lîra ra 70 lîra zî danê çawişan. Heyf ke tîya de sewbîna îmkanê karî çin o. Ma mejbur ê ke tîya de bixebitê.’’
Sagîye Varola 44 serrî îfade kerd ke seba ke a domananê xo bida wendene û debara keyeyî bikera xebitîyena. Sagîye vat: ‘’Sewbîna kar çin o. Eke ez nêxebita domanê mi do vêşan bimanê. Çar domanê mi est ê. Ez nêzanena ke kamyewî bida wendene. Yewmîyayê ma ardan û şekerî rê nêvejîyenê. Ma bi deynan debara xo kenê.’’
Sûltane Şeftalîdaliya 14 serrî seba paştdayîşê keyeyê xo hêgayan de xebitîyena. Sultane vat: ‘’Ez sey domanêke tîya de zaf zehmetîyan ancena. Dima ke dibistana ma tehtîl bîye ez ameya tîya. Ez wazena bi pereyê xo kitab, şeker yan zî kincan bihêrîna. Cinîyî nêeşkenê pereyê xo seba xo xerc bikerê, danê keyeyê xo. Ma kenê ke bi keda xo payan ser de bimanê.’’
