Bi pêşengiya TJA, DEM Partî, DBPê li gundê Simakê yê navçeya Sûrê civina gel hat lidarxistin. Gel di civînê de ji ber dîtina dîmenê Rêberê Gelê Kurd Abduulah Ocalan kêfxweşiya xwe anî ziman.
Piştî banga Rêberê Gelê Kurd Abdullah Ocalan a 27ê Sibatê pêvjoya ‘Aştî û Civaka Demokratîk’ destpê kir. Ji bo pêvajo baş bê fêmkirin bi pêşengiya Partiya Wekhevî û Demokrasiyê ya Gelan (DEM Partî), Partiya Herêmên Demokratîk (DBP), Tevgera Jinên Azad (TJA) ‘Civînên Aştî û Civaka Demokratîk’ her roj bênavber têne lidarxistin. Îro li gundê Simakê yê navçeya Sûrê ya Amedê civîna gel hat lidarxistin. Tevî nûnerên rêxistinên sivîl û siyasî gelek şêniyên gund beşdarî civînê bûn.
Onder Akbulut ewilî axivî û diyar kir ku ji roja ku pêvajoya aştiyê hatiye destpêkirin heta niha dewletê gavên erênî neavêtiye û wiha got: “Piştî 26-27 salan me îro dîmenê Rêber Apo dît, em gelek kêfxweş bûn. Di vê pêvajoyê de divê dewlet gav biavêje. Gelê Kurd li çar aliyê cîhanê xwe bi rêxistinkirî ye. Li her derî divê em bingeha siyaseta demokratîk xurtbikin. Heke ku em wisa nekin em ê her ku biçin qels bibin. Divê em têkoşîna xwe xurt bikin.”
‘Partî û tevger êdî bûne ruhek’
Endamê Lijneya Rêveberiya Herêmî yê DEM Partiyê Yaşar Karakuş jî wiha got: “Em bi xwe bawer in, gel baweriya xwe bi kê bîne divê pergal jî baweriya xwe pê bîne û xwe biguherîne. Ger pergal di vê astê de be tiştekî bi ser naxe. Em ê pêncî salên din jî şer bikin dê dîsa jî dewlet ber bi Kurdan bê. Dema ku stratejiya şer bê guhertin jixwe rêxistin jî diguhere. Partî û tevger êdî bûne ruhek. Dema ku em weke civak xwe bi rê ve bibin ne hewceye dewletê ye.”
