Grûba Aştî û Komelê Demokratîkî eşkerayî daye û vat: “Seba ke ma tîya ra pey têkoşînê xo yê azadîye, demokrasî û sosyalîzmî bi rêbazanê hiqûqî û sîyaseto demokratîk rayra berê û bi bingeyê vetişê qanûnanê entegrasyono demokratîk, ma çekanê xo bi îradeyê xo yo azad îmha kenê.”
Eşkertayîya Grûba Aştî û Komelê Demokratîkî wina ya:
“Seba şarê ma û raya pêroyî,
Bi amaco ke prosesê bedilnayîş û bedilîyayîşo demokratîk bi lez aver şêro, Grûba Aştî Komelê Demokratîkî ameye awankerdene. Heme çî ra ver seba şima şahidîya na çalakîya ma ya tarîxî û demokratîk kenê, ma şima pêrûnan bi rêzdarî silam kenê. Vera hêrişanê bi amancê çinkerdişî yê vera estbîyayîşê şarê kurdî, demanê cîya û herêmanê cîyayan de ma grûbêka cinî û camêrdê kurdî, ma çek girewt û ma sey Şervanê Azadîye beşdarê refanê PKK’yî bîyê.
Eke ewro ma tîya de amade yê, no cewabê seba vengdayîşê 19ê hezîrana 2025î yê Rayberê Şarê Kurdî Abdullah Ocalanî yo. Reyna ameyîşê ma yo tîya, esasê Vengdayîşê Aştî û Komelê Demokratîkî yê Rayber Abdullah Ocalanî yo 27ê sibata 2025î û çarçewaya qeraranê Kongreya 12. ya PKK’yî ke mabênê 5 û 7ê gulana 2025î ameye kerdene, ser o yo. Eke ma ewro tîya de yê, no seba serkewtişê Prosesê Aştî û Komelê Demokratîkî nîyeto baş û qerardarîye yo.
Tîya ra pey do têkoşînê ma yo azadîye, demokrasî û sosyalîzmî bi rêbazanê hiqûqî û sîyaseto demokratîk rayra berê û bi bingeyê vetişê qanûnanê entegrasyono demokratîkî dewam bikero.
Seba ke no amanc bêro ca, ma ewro huzirê şima de bi îradeyê xo yo azad çekanê xo îmha kenê. Na gama ke ma erzenê, sere de cinî û ciwanî, heme şarê ma, şaranê Tirkîya û Rojhelatê Mîyanênî rê pîroz bo. Hêvî û çîyo ke ma pawenê o yo ke na game biba wesîleyê caardişê aştî û azadîye. Rayber Abdullah Ocalan mesajê xo de wina vatbi, “çekî ra ney, bawerîya mi bi hêzê sîyaset û aştîya komelî ra yena, vengdayîşê mi şima rê o yo ke goreyê nê prensîbî têgêrê.
Ma zerrî ra beşdarê nê vengdayîşî benê û seba ke ma do lazimtîyanê nê prensîbî bica bîyarê, ma bextewar ê. Ma baş zanê ke heta nika çiyêk bi asanî, bêbedel û bêtêkoşîn nêbîyo; eksê ci her çi bedelanê pîlan û bi saya têkoşîno bêemsal ameyê destfînayene. Ma na rastîye baş zanê. Nê esasî ser o seba destvistişê demokrasî û serkewtişanê neweyan, ma zerrî ra fikir û paradîgmaya Rayber Abdullah Ocalanî ra bawer kenê.
Eynê wextî de ma bi hêzê kolektîf yê xo û komelê hemrayanê xo ra zî bawer ê. Nê wextî de ke dinya de zexto faşîst zêdîyayo, herêma ma Rojhelatê Mîyanênî de açarîyaya gola gonî û seba aştî û azadîya şarê ma her wextî ra zafêr cuya
seyyewbîne û demokratîke lazim a. Nê semedî ra ma baş zanê ke nê gamî tarîxî çend muhîm ê û lazim o demêko kilm de bêrê caardene.
Ma hevî kenê ke her kes, cinî û ciwanî, karker û kedkarî, hêzê sosyalîst û demokratîkî, pêro şarî û merdimîye qîmetê gamanê ma yê aştî û demokrasî bivînê, rast fehm bikê û ci rê hurmet bikerê. Ganî hêzê herême û globalî yê ke dejê şarê ma ra berpirsîyar ê, eşkera paştî bidê rewabîyayîşê heqanê demokratîk û neteweyî yê şarê ma. Nê esasî ser o ma vengdanê ê hêzan ke bibê hetkarê prosesê aştî û çareserîya demokratîke. Sere de cinî û ciwan, karker û kedkarî, ma vengdanê heme şaran, hêzanê sosyalîst û demokratîk, hiqûqnas, hunermend û sîyasetmedaran ke na gama ma ya tarîxî rast fehm bikê û mil bi mil paştî bidê şarê ma. Reyna ma veng danê ke wa semedê azadîya fîzîkî ya Rayber Apoyî û çareserkedişê meseleyê kurdan aktîf têkoşîn bikerê, têkoşînê sosyalîstî yê enternasyonalî û paştîdayîşî xurt bikerê.
Vendgayîşê ma seba şarê kurdî û hêzanê sîyasî zî no yo:
Lazim o no proseso tarîxî û vengdayîşê Aştî û Komelê Demokratîkî yê Rayber Apoyî rast bêro fehmkerdene. Qadanê perwerde, rêxistinî û çalakîyan de wezîfeyanê xo bi hewayêko serkewte bîyarê ca û cuya demokratîke aver berê. Zilm û asîmîlasyon do biqedîyê, azadîye, hetkarî û yewbîngirewtiş do serkewê. Prosesê Aştî û Komelê Demokratîkî do teqez serkewo.
11ê temmuza 2025î
Grûba Aştî û Komelê Demokratîkî”
