Bi serran o bi nameyê cigêrayîşê petrolî Koyê Gabarî de darî yenê birnayene û xoza yena talankerdene. Dîmenêko peyên de ke ma dest kewt, Koyê Gabarî dînamîtan reyde yeno teqnayene. Toz û dumanê dînamîtan derûdorî de vila beno.
Bi Hemkarîya Anonîm a Petrolanê Tirkiya (TPAO) û şîrketê Turkish Petroleum International Company (TPIC) serra 2022î ra Koyê Gabarî de xebata vetişê petrolî kenê. Goreyê daneyanê TPAO’yî yê 2025î ra heta nika 114 bîrê petrolî ameyê kenayene û roje de 81 varîlî petrol yeno vetene. Nameyê cigêrayîşê petrolî ser o bi bîranê petrolî heme cayê koyî bi dînamîtan yeno teqnayene. Sey Ajansê Welatî vîdeoyê gama teqînayîşê dînamîtan ê Çîyayê Gabarî kewt destê ma. Hetê Banga Elîyê Mil ê Koyê Gabarî ra dînamît yeno teqnayene û toz û dumanê dînamîtan derûdorî de vila beno.
Gama teqînayîşê dînamîtan de zî aseno ke qadêka hîra ya hetê Banga Elîyê Mil ê Koyê Gabarî dînamîtan reyde yeno teqnayene. Rêzêko hîra ya koyî bi teqînayîşî dînamîtan rijîyeno û vengê ey zî mîyanê koyî de vila beno. Heta nika xeyê reyan Koyê Gabarî dînamîtan reyde ameyo teqnayene û encamê teqnayîşê dînamîtan de xozaya koyî wêran bîya. Heme cayê Koyê Gabarî seba viraştişê rayîrî yê wesayîtanê girdan ê ke petrolî de xebitîyenê, bi dînamîtan ameyê teqnayene û heme cayê koyî ameyê kenayene.
Tesîrê teqînayîşê dînamîtan ê xoza ser o
Koyê Gabrî ke her roje bi tonan darê ci hetê cerdevanan ra yenê birnayene û daristanê ci yenê çinkerdene, bi dînamîtan yenê wêrankerdene. Dînamîtî tena koyê nêrijnenê, tesîrêko pîl xoza ser o kenê. Cayo ke dînamîtî yenê teqnayene, kerreyî parçe benê û hezaz beno. Reyna habîtata xoza zî herimîyena û nebatî orte ra wedarîyenê. Demê teqînayîşî de toz û dumanê dînamîtan ke mîyanê koyî de vila beno, oksîtê nîtrojen û gazanê cîyayan vejeno û no çî zî seba welatijanê derûdorî tehlukeyê nêgirewtişê boye xo reyde ano. Hetê bînî ra cayo ke dînamît yenê teqnayene, eke awe est ba çimeyê awe zî orte ra wedarneno û beno sebebê kêmbîyayîşê awe. Koyê Gabarî ke verî ra cayê pezkovî, xoz, heş û heywananê cîya cîyayan o, riyê teqnayîşê dînamîtan ra habîtatê heywananê xerîb ê koyî zî orte ra warişto.
