Koçer Erhan Îlgen derheqê Hênîyê Xerzî yo ke Zozananê Hesendînî de herikîyeno dîyar kerd ke Hênîyê Xerzî derûdorî gandar keno û vat: “Eke hênî ziwa bibo, do cuya ma zî biqedîya.”
Seba koçeranê ke zozanan de ciwîyenê, tayê çîyî ke înan rê lazim ê est ê. Înan ra yew zî awe ya. Koçerî hênîyan reyde hewcedarîya xo ya awe peyda kenê. Zozananê Hesendînî de nêzdîyê 200 hênîyî est ê. O ke tewr kehen o û hîkayeya ey est a, Hênîyê Xerzî yo. Nê 200 serrî yê bêmabên awe Hênîyê Xerzî ra herikîyena. Çi hamnan çi payîz, her wext herikîyayo û derûdorê xo gandar kerdo. Koçer Erhan Îlgen derheqê tarîxê Hênîyê Xerzî û muhîmîya awe ser o ma rê qisey kerd.
‘Hênî gan dano ma’
Erhan Îlgenî dîyar kerd ke no hezar serrî yo tîya de ciwîyenê la îşxalkerî wazenê înan herême ra vejê û wina vat: “200 serrî ra ver qewmêk ameyo na herême. Nameyê pêşengê înan Xerzo bîyo. Tîya de zozan de bîyê. Riyê piroblemêkî ra o qewm têmîyan keweno û dima orte ra wedarîyeno. 36 serrî ra ver ma ameyê Zozananê Hesendînî. Her serre tewr kêm ma 5-6 aşmî tîya de manenê. Ma wayîrê nê erdî yê. Ewro destanê xo dergî erdê ma kenê. Zozan de ma nêeşkenê zaf karê ramitişî bikerê. Seba ke kerreyî zaf ê, ramitiş nêbeno. No hênî seba ma gelekî muhîm o. O gan dano ma.”
‘Kesê ke zozanî de ciwîyenê bi hênîyan cuya xo domnenê’
Erhan Îlgen dîyar kerd ke Hênîyê Xerzî dewa Henzî ra dest pêkeno û dewanê Girindesê, Toçka, Xuşav, Nêrçik, Kevrê Nivisî, Taxa Newalê, Dimilya, Mezra Corine û heta Hêlînî ra vîyareno. Erhan Îlgenî dewamê qiseykerdişê xo de nê çîyî vatî: “Pêroyê herême bi Hênîyê Xerzî yeno awdayene. No hênî ziwa bibo do pêroyê herême zî bêawe bimana. Do cuya ma biqedîya. Zozananê Hesendînî de nêzdîyê 200 hênîyî est ê. Ma ê hênîyan ra awe şimenê. Kesê ke zozanan de ciwîyenê bi hênîyan cuuya xo domnenê. Vaşî bi na awe şîn benê. Heywanê ma nê hênîyan ra awe şimenê. Tîya maden bibo, do cuya ma biqedîya.”
