Kiştişê 33 dewijanê Seravî ke sey “Hedîseyê 33 Guleyî” zî yeno zanayene, 82 serrî vîyartê. La Gelîyê Sefo ke cayê qirkerdişî yo û yeno zanayene ke kateyê kesanê ke ameyê kiştene uca de yê, hema zî qedexe yo.
Leşkerê dewleta tirke binê Fermandarîya Artêşî ya Orgeneral ya Mustafa Muglali ya 3. de 28ê temmuza 1943î de dewanê Xerapsork, Êngiza Milan û Runexwir ê girêdayeyê qezaya Serava Wanî, 33 dewijî bi maneya “Sînorî vîyartî” destbend kenê û dima ra zî înan gênê. Mufetişê Wezaretê Karanê Zereyî Avnî Dogan şono girewteyan reyde pêvînayîş keno û fehm keno ke dewijî bêsûc ê. La qeymeqam û serbazê ê wextî mufetîşî nêgotarenê û bi zura “Nê kesî şonê pozîsyonê ma Rusan ra vanê” qerarê dewamê girewtebîyayîşî înan danê. Fermanê Muglaliyî 30ê temmuza 1943î de şewe leşkerî înan hepisxane ra vejenê û teslîmê fermandarê tabûra sînorî kenê. Leşkerî 33 dewijan benê Gelîyê Sefo yê girêdayeyê Koçkerdişê Corîne ya qezaya Qelqelî û dest û çimanê înan girêdanê. Dewijî bi fermanê Mustafa Mugllai ke ewleyîya sînorî ra berpirsîyar bi, yenê kiştene û cenaze zî uca de yenê kiştene.
Tena dewijêk qirkerdişî ra xelisîyeno la o zî 3-4 aşmî ra pey mireno
Nê qirkerdişî de tena dewijo bi nameyê Îbrahîm Keklîk (Apê Îbrahîm) seba ke termanê dewijanê bînan de maneno, birîndar xelisîyeno. Îbrahîm Keklîk bi halê xo yo birîndaar vîyareno Rojhelatê Kurdîstanî û 3-4 aşmî ra pey o zî mireno. Hedîse ser o ra 82 serrî vîyartê la hema zî Gelîyê Sefo binê nameyê “Herêma ewleyîye” de qedexe yo. Merdimê dewijanê ke ameyê qirkerdene zî xeylê reyan seba şîyayîşê Gelîyê Sefo û girewtişê kateyanê merdimanê xo muracatê sazgehanê wezîfedaran kerdo la waştişê înan tu wext nêameyê qebulkerdene.
