Komîteya Ekolojî ya KCK’yî: “Ganî vera nê qirkerdişan pawitoxê xoza, ekolojîst, roşnvîr, cinîyî yanî pêro şarî têkoşînî her ca de pîya pîlêr bikerê.”
Komîteya Ekolojî ya KCK’yî derheqê şewatanê daristanan de eşkerayîyêke daye. Eşkerayîye wina ya:
“Tirkîya û Vakurê Kurdîstanî de her roje şewatê daristanan, qirkerdişê xoza est ê. Eskîşehîr de 10 karkeranê daristanî, Bursa de yew karkerî û Rojhelatê Kurdîstanî de embazanê ma şewatan de dinyaya xo bedilnaye. Ma nê ewladanê şarî yê fedakaran bi hûrmet û rehmete yad kenê. Sere de keyeyanê înan rê ma pêro şarê Kurdîstanî û Tirkîya rê serweşîye wazenê. Nê merdiman mojna ke welatperwerîye û têkoşînê ekolojî ganî senî bibê. Ma soz danê ke ma do têkoşînê ekolojî pîlêr bikerê.
Nê tabloyê şewatî yê xirabî ra aseno ke sebebê nê şewatan tena bêdîqatîye û germîye ney îhmalê dewlete yo. Seke şarê ma vano mesuldarê nê bedelanê giranan hukmatê AKP’yî yo. Seba ke ekîpmanê karkeran kêm bîyê, şertê xebata asayîye çin bîyê û selahîyetdaran îtîraf kerdo rolê îqtîdarî şewatan de deşîfre bi.
Goreyê doneyanê fermîyan Tirkîya û Kurdîstan de emser tewr tay 3 hezar şewatî vejîyayê û menganê temmuze û hezîrane de qsê 650 hektar daristanî vêşayo. Rixmê germîya globale zî AKP’yî tedbîrî nêgirewtî. Şarî şewatan de zî teyna mendî. Dewleta ke bi artêşa xo ya NATO’yî wesfanê xo dana, seba hewnakerdişê şewatî çimeyan nêvînena.
AKP bi polîtîkayanê xo yê vera ekolojî û rijnayîşê ekolojî zî verê çiman de yo. AKP destpêkî ra nata çim verdano aw, daristan û erazîyanê şarî û polîtîkayanê rantî awan keno. Daristanî pêşkêşê şîrketan yenê kerdene. Botan de bi destê leşker û qoricîyan qirkerdişê daristanan yeno kerdene. Wextê AKPyî de warê daristanan seba madenan û enerjî pêşkêş benê coka nê şewatî persan virazenê. Na rewşe mojnena ke ganî na dewlete rê daristanî yan zî warê cuye nênê emanetkerdene.
Heta nika şewatî bi keda şarî ameyî hewnakerdene. Wina aseno ke eke dewlete ra çîyêk bipawîyo do ancî felaketêk biqewimîyo. Ganî no paştdayîş û keda şarî bivurîyê hêzêkê rêxistinkerdeyî. Dewlete ney la têkoşîno rêxistinkerde do bieşko xozaya ma bipawo. Ganî nê bêmesuldarî û polîtîkayê rantî bêrê deşîfrekerdene.
Nê bedelê ke têkoşînê ekolojî û şewatan de dîyayê mojnenê ke ma pîya têbigêrê, paştdayîşî pîlêr bikerê, rêxistinîye aver berê û çalak bibê. Ma mejbur ê ke erjanê xo yê hemparan ê sey awe, daristanan, herre bipawê. Ganî vera nê qirkerdişan pawitoxê xoza, ekolojîstî, roşnvîrî, cinîyî yanî pêro şarî têkoşînî her ca de pîya pîlêr bikerê û mîrasê xo yê tewr pîlî neqlê neslanê bînan bikerê. Têkoşîno hempar verê tehlukeyanê tewr pîlan de garantîya ma ya tewr pîl a.”
