Verfeka Meclîsê Cinîyan a DEM Partî Halîde Turkoglu îfade kerd ke Şorişê Rojava seba Tirkîya tehdît nîyo û vat: “Ma Şorişê Rojava bi pêşengîya cinîyan pawenê. Ganî îradeyê şaranê Sûrîye bêro pawitene.”
Verfeka Meclîsê Cinîyan ê Partîya Têduştî û Demokrasî ya Şaran (DEM Partî) Halîde Turkoglu derheqê rojevê cinîyan de Merkezê Pêroyî yê DEM Part de kombîyayîşê çapemenî kerd. Halîde Turkoglu bi serrgêra kiştişê parlamenterê DEP’î Mehmet Sîncarî yo 32. dest bi qiseykerdişê xo kerd û wina vat: “Kiştişê Sîncarî waştişê aşitî, têduştî û azadîye rê hêrişêk bi. Sûcdarê rasteqînî qet nêameyê muhakemekerdene. Vengdayîşê Birêz Ocalanî seba rîbirîameyîşê tarîxî û dayîşê hêvî Dayîkanê Şeme, Dayîkê Aştî û heme kesan rê bi. Ma cinî seba xurtkerdişê na hêvî û awankerdişê aştîyêka bi rûmete xebitiyernê. Çareserîya demokratîk a meseleyê kurdî bi rîbirîameyîşê heqîqetan reyde mumkin o.”
‘Ganî îradeyê şaranê Sûrîye bêra naskerdene’
Halîde Turkoglu dewamê qiseykerdişê xo de bale ant tehdîtanê rayedaranê Tirkîya yê vera Vakur û Rojhelatê Sûrîye û wina dewam kerd: “Komîsyonê Meclîsî ganî Dayîkanê Aştî û Şemeyî bigoşdaro û gamê ke lazim ê bi lez bierza. Aştî tena mabênê camêrdan de nîya; no vengdayîşê aştî yê heme kurd, cinî û cuya newa ya Vakur û Rojhelatê Sûrîye eleqedar keno. Ganî hêrişê heq û deskewteyanê kurdan ser o bêrê vindarnayene, ziwanê dayîke bêro pawitene, sîyasetê qeyûman biqedîyo û demokrasîyê herême bêro xurtkerdene. Şorişê Rojava tehdît nîyo. Şerê Rojhelatê Mîyanênî cuya cinîyan tarî kenê. Hêrişê cinîyanê afgan, îran, filîstîn, suveyda û lazkîye nêyenê qebulkerdene. Ma Şorişê Rojava yê bi pêşengîya cinîyan pawenê. No şoriş seba Tirkîya tehdît nîyo, tehdîto rastî çeteyê ke cinîyê elewî û durzî kişenê, ê yê. Ganî îradeyê şaranê Sûrîye bêro naskerdene.”
Halîde Turkoglu peynîya qiseykerdişê xo de bale ant dosyayanê cinîyan ke yenê kiştene ser o û dîyar kerd ke ê do destûr nêdê ke dosyayê înan bêrê girewtene. Halîde Turkoglu behsê fetwayanê Serokatîya Karanê Dîyanetî kerd û îfade kerd ke ê cinîyan hedef gênê, vernîya kiştişanê cinîyan akenê û heqanê cinîyan binpay kenê.
