Kampanyaya ‘Ez wazena Abdullah Ocalanî bivîna’ ya ke Sûrîye de dest pêkerdbî, ewro qedîyaye. Her hetî Sûrîye ra kesî beşdarê kampanya bîyê. Amed dîyarkerdene ke do encamê kampanya 21ê êlule de bêrê eşkerakerdene.
Sûrîye de Kampanyaya ‘I Want to Visit Ocalan / Ez Wazena Ocalanî bivîna’ 5ê hezîrana 2025î de dest pêkerdbî. Kampanyaya ke 20ê tebaxe de hetê Înîsîyatîfê Avûkatan ê Sûrîye ameybî destpêkerdene, ewro qedîyaye. Eşkerayîya destpêkerdişê kampanya de amebi dîyarkerdene ke do 30ê tebaxe de biqedîya la seba eleqeyêka girde kampanya heta ewro dewam kerde.
Goreyê agahîyanê ke Endamê Rayberîya Înîsîyatîfê Azadîya Rayberê Şarê Kurdî Abdullah Ocalanî ê Sûrîye Ferzende Munzur sayê Ajansê Xeberan ê Hewarî (ANHA), hûmara kesayetanê huqûqnas, akademîsyen, sîyasetmedar, rewşenbîr, serekê eşîr, dîndar, doktor, endezyar, rîsipî (suryan-asur-êzidî), temsîlkar û mezhebê kurd, ereb, suryan-aşûr, êzidî, tirkmen, çerkes, sinî, elewî, îsmaîlî, durzî, xirîstiyan hûmara kesanê ke wazenê Rayberê Şarê Kurdî Abdullah Ocalan reyde pêvînayîş bikerê, 2 hezarî vîyarto. La nika ê nêeşkenê hûmara peyêne eşkera bikerê û wina vat: “Hûmara peyên a beşdarbîyayîşî do 21ê êlule de bêra eşkerakerdene.”
Ferzende Munzurî da zanayene ke heme kantonê Herêma Vakur û Rojhelatê Sûrîye, reyna heme eyaletê Sûrîye yê Şam, Heleb, Humis, Laziqîye, Tertûs, Dera, Qûneytira, Idlib û Siwêda ra kesayetî beşdarê kampanya bîyê.
Îmzayê ke ameyê komkerdene do pêşkêşê Sekreterê Neteweyanê Yewbîyayeyan (NY), Yewîya Ewropa, Konseya Heqê Merdiman a NY’yî, Rêxistina Vernîgirewtişê Îşkenceyî yê Ewroğa (CPT) û Wezaretê Edaletî yê Tirkîya bêrê kerdene.
