Cigêrayîşanê ke qezaya Farqînî ya Amedî hîdûdê çar dewan de ameyî kerdene de, vînayîşê muhîmî yê ke do roşnî bidê tarîxê merdimîye, vejîyayî meydan. Sarnîcê ke zereyê kemeranê pîlan de ameyî nakerdene, nerduwanê destvete, mezêlê kemerî û yew sîstemê awe yo binêerdî yo averşîye ameyî vetene ru-rocî ser.
Cigêrayîş de ame eşkerakerdene ke şopê cîwaranê ke heta serranê 10.200î yê V.Î. (Verê Îsayî) şonê, ameyî dîyene. Yeno vatene ke nê vînayîşî derheqê dewranê ke tede komelê seydker-arêkerî derbazê cuyêka menteqî bîyê û gama verêne ya ziuretî eşta, malumatanê muhîman anê xo de.
Devere, xususîyetanê xo ra cîwarê Çayonuyê Erxenî ana vîrê merdimî, û yew golo ke mîyanê Gola Maseyan anîyeno zî bala anceno. Sey yew hedîseyêkê tebîetî yo balkêş ame dîyene ke maseyê mîyanê golî wextê sibayî de vînî benê û wextê şanî de reyna vejîyenê meydan. Reyna, xirabeyê sûr û bedenan ê ke çar dewan zî kenê xo zere, mocnenê ke devere yew cayo cîwarî yo organîzekerde bîya.
Seba pêro tarîxê Mezopotamya muhîm ê
Hemsereka Şaredarîya Farqînî Sevîm Bîçîcî da zanayene ke ê xebatanê envanterê turîzmî yê ke hetê Mudirîya Karanê Kulturî û Sosyalî ra ameyêne rayraberdene de resayê nê vînayîşan û wina va: “Nê awanîyê tarîxî yê ke heta ewro nêvejîyayê ru-rocî ser, ne tenîya seba Farqînî, seba pêro tarîxê Mezopotamya zaf muhîm ê. Ma tewr verî Wezaretê Kultur û Turîzmî ra, dima arkeolog û tarîxzanî ra wazenê ke bêrê devere û tede cigêrayîşan bikerê. Ma sey Şaredarîya Farqînî no kifş veto meydan, la seba ke kedayîş û xebatê îlmî bêrê kerdene, paştîdayîşê hetanê akademîkan lazim o.”
Bîçîcî bal ante ser ke no kifş ne tenîya yê Farqînî, eynî wext de yê tarîxê Amedî û Anatolîye zî parçeyêko muhîm o û nê qiseyî kerdî: “Ganî yew kêlî verî bêrê dewere û xebatê îlmî bêrê kerdene. No mîras xezîneya mustereke ya tarîxê merdimîye ya.”
