Nuştox Beşîr Mela Newaf ard ziwan ke seba ke Kurdî heqanê xo bigîrê firsendêko tarîxî kewto destê înan. Û vat ke seba ke bieşkê xo dinya rê bidê şinasnayîş ganî nê firsendî vindî nêkerê
Endamê Roşnvîranê Yewbîyaye yê Kantona Cizîrî nuştox Beşîr Mela Newafî prosesê peyên yê Sûrîye û hemverê na rewşe de vindertişê Kurdan ajansa ANHA’yî rê erjna.
Mela Newafî vat ke ganî Kurdî demê xo yê vîyarteyî ra ders bigîrê û wina dewam kerd:
“Wextê Lozanî de Kurdîstan bî çar parçe. Şerê Dîyin yê Dinya de nê sînorî reyna bedilîyayê. Dima Yewîya Sovyetan rijîyaye, rejîmê Saddamî rijîya û herême de bedilîyayîşê muhîmî bîyê.”
Mela Newafî ard ziwan ke kesê ke daxilê prosesî bîyê ganî vernîya parçebîyayîşê welatî û qeraranê krîtîkan bigîrê û wina dewam kerd:
“Ewro Sûrîye de ravûrîyayîşêk qewimîyeno. La welatî Misilman û Erebî ganî nêvajê ‘ma rejîmo tewr faşîst rijna, êdî qerarî destê ma de yê.’ Ganî xo wina şaş nêkerê.”
‘Eke ma nê firsendî vîndî bikerê ma do reyna vîndî bikerê’
Mela Newafî seba rewşa Kurdan a nikayin û rewşa înan a vernîya ma de hêvîyê xo ardî ziwan û dîyar kerd ke no proses girêdayeyê yewîya Kurdan o.
“Çi heyf ke nê 13-14 serrî yo ke mabênê Kurdan de yewîye nêbîye. La ewro tayê hêzê teberî Kurdan ra yewîye wazenê. Ganî şarê Kurd na rewşe weş analîz bikero û firsendî vîndî nêkero. Eke ma nê firsendî baş nêerjnê do demo dîyin yê Lozanî bêro ciwîyayene û ma do reyna vîndî bikerê. Ma bibê yew û binê heyetêkî de bêrê pêser. Nameyê Rayberîya Xosere ser o heyetêk eşkeno şêro Şam. Ganî ma bimojnê ke Kurdî herême de gamanê muhîman erzenê, vernîya qirkerdişan û talanî gênê.”
Mela Newafî tewr peynî bale ant rolê çapemenîye ser o û ard ziwan ke nê prosesî de ganî çapemenîye zî rol û mîsyonê xo bîyara ca.
