Meksîka de 35 cinîyan seba ke paştî bidê şarê kurdî û bale biancê “Heqê hêvî” yê Abdullah Ocalanî ser o, dest bi çalakîyêka ke do 2 rojan dewam bikera, kerd.
35 cinîyê meksîkayijî seba ke paştî bidê şarê kurdî û bale biancê heqê hêvî yê Rayberê Şarê Kurdî Abdullah Ocalanî ser o, 15ê êlule de dest bi çalakîyêk kerd ke do 2 rojan dewam bikera. Cinîyê ke çarçewaya gama “Rayber Apo rê Azadîye” de ney ra ver kampanyayê îmzayan organîze kerdî, na rey zî çalakîyêka hîna afernayoxe daye destpêkerdene. Beşdaran his û fikrê xo yê Rayberê Şarê Kurdî Abdullah Ocalanî ser o bi çekuyêk kaxizêk de nuşt û dima ra zî nê çekuyî kerdê şîîrêka hempare.
Reyna bi rayîrê kanalanê resnayîşî yê têgêrayîşanê xo, dimayê nêmroje bi waştişnameyêk kampanyaya maîlî daye destpêkerdene. Şîîra hempare û waştişname do Sersefîrîya Berze ya Tirkîya ya ke Meksîka de ya, Konseya Ewropa û Wezaretê Edaletî û Tirkîya rê bêrê erşawitene.
Ewro zî bi beşdarîya derûdoranê cîyayan kampanya yena hîrakerdene. Çalakîkeran ra 3 cinî şîîre amade kerde û bi vîdeoyêk pare kerde. Çalakî do siba 17ê êlule de biqedîya.
Waştişnameyo ke sazgehanê fermî ra ameyo erşawitene wina yo:
“Erdî ra ke sey Meksîka yeno zanayene
Sey cinîyanê ke Meksîka de xover danê, ma zî wazenê ke heqê hêvî yê Rayberê Şarê Kurdî Abdullah Ocalanî bêro naskerdene.
Ma paştî danê têkoşînê şarê kurdî yê seba dîyarkerdişê çarenusê xo û seba ke Abdullah Ocalan şarê xo reyde beşdarê cigêrayîşê çareserîyêka têduşt û sîyasî bibo, ganî azad bibo. O semed ra ma na şîîre bi vengê xo resnenê şima.”
