Mûsa Anter do serrgêrê qetilkerdişê xo yê 33. de Amed û Mardîn de bêro vîrardene.
Rojnameger û nuştox Mûsa Anter (Apê Mûsa) 20ê êlula 1992 de Amed de hetê JÎTEM ra ame qetilkerdene. Komela Rojnamegeran a Dîcle Firatî (DFG) do Anterî bîyara xo vîr. Anter do semtê Seyrantepe yê Yenîşehîrî yê Amed de cayo ke amebi qetilkerdene, uca de bêro vîrardene. Programê vîrardişî do 20ê êlule de saete 11:00 de bêro kerdene.
Eynê roje Mûsa Anter do dewa Sitîlîlî ya qezaya Nisêbîn a Mardîn de mezelê xo ser o bêro vîrardene. Programê vîrardişî yê ucayî do saete 15:00 de dest pêbikero.
Eynê wextî de 20ê êlule de Xelatê Rojnamegerî yê Mûsa Anter û Şehîdanê Çapemenîya Azade bêrê dayene. Torenê xelatdayîşî do saete 18:00 de Merkezê Kultur ê Cem Kara yê Bakirkoy ê Stenbol de bêro kerdene.
Eşkerayîya DFG’yî
DFG’yî derheqê programê vîrardişî de hesabê xo yê X’î ser o nê mesajî vila kerd: “Ma Apê Mûsa bi rêzdarî anê xo vîr. Zanayo kurd, rojnameger û nuştox Mûsa Anter (Apê Mûsa) 20ê êlule de serra 1992î de Kuçeyê 442. ê Taxa Cumhurîyetî yê Semtê Seyrantepe yê Amedî de hetê JÎTEM ra ame qetilkerdene. Qetilkerdişê ey ser ra 33 serrî vîyartê. Ma do Apê Mûsa ewil Amed de cayo ke amebi qetilkerdene, uca de bîyarê xo vîr, dima ra zî qezaya Nisêbîn a Mardînî de mezela ey ser o, bîyarê xo vîr. Eynê wextî de Rojnameyê Yenî Yaşamî do programê Xelatanê Rojnamegerî yê Mûsa Anter û Şehîdanê Çapemenîya Azade organîze bikero û hemkaranê ma yê serkewteyan bi xelat bikero.”
