Amed – Rêxistina DEM Partiyê ya Amedê bi rêxistina DBP û rêveberiya TUAY DERê re li Amedê ji bo Mafê Hêviyê yê Rêberê Gelê Kurd Abdullah Ocalan bi daxuyaniyekê kampanaya îmzeyan da destpêkirin.
Bi boneya Mafê Hêviyê yê Rêberê Gelê Kurd Abdullah Ocalan Rêberên DEM Partî, Partiya Herêmên Demokratîk (DBP) û Komeleya Alîkariya bi Malbatên Girtiyan re (TUAY DER) a Amedê, Hevşaredarên Bajarên Mezin û navçeyan yên Amedê û nûnerên saziyên sivîl, li pêşiya Ceylan AVMê daxuyaniya çapemeniyê li dar xistin. Di daxuyaniyê de bi zaravayên Kurmancî û Dimilkî û Tirkî pankarta “Em aştiyê dixwazin ji ber ku em bawerin ku em ê Cumhuriyeteke demokratîk ava bikin” hate vekirin.
Hevseroka Komeleya Alîkariya bi Malbatên Girtiyan re (TUAY-DER) Yeter Erel Tuma destnîşan kir ku banga Rêberê Gelê Kurd Abdullah Ocalan nexşerê ye û wiha got: “Pêdiviya gelan bi aştî û demokrasiyê heye. Em îro ji bo azadiya Abdullah Ocalan kampanyayê didin destpêkirin.”
Di daxuyaniyê de Hevserokê DEM Partiyê yê Amedê Abbas Şahîn axivî. Abbas Şahîn destnîşan kir ku ji bo azadiya Rêberê Gelê Kurd Abdullah Ocalan divê demildest mafê hêviyê were pêkanîn. Abbas Şahîn bal kişand ser polîtîkayên ku qeyranên siyasî, aborî û civakî kûr kirine û wiha got: Siyaseta Şer xizanî bêkarî, kedxwarî, tundiya li dijî jinan û komkujî zêde kirine û bûye sedema hilweşîneke tevahî. Em mehkûmê siyaseta şer û tariya ku ji ber wê hatiye afirandin nînin; em aştiyê dixwazin. Bi banga Aştî û Civaka Demokratîk re, hêviya aştiyê mezin bûye ku gel bi slan e bi biryardarî li vê hêviyê xwedî derketiye. Niha em li dora vê bangê dibin yek û em ji bo demokrasî wekhevî û azadiyê bang dikin.”
Daxwaz hatin rêzkirin.
Abbas Şahîn di daxuyaniyê de diyar kir ku ew bo Mafê Hêviyê yê Rêberê Gelê Kurd Abdullah Ocalan starta Kampanyaya Îmzeyan destpêkirin û daxwazên xwe wiha rêz kirin.
“Em aştiyê dixwazin ji ber ku em civakekê diparêzin ku tê de gel û bawerî bi azadî û wekhevî, bi hev re bijîn.
Em aştiyê dixwazin ji ber ku em dibêjin mîsogerkirina demokrasî, azadî, wekhevî û edaletê bi çareseriya demokratîk a meseleya Kurdan re girêdayî ye.
Em aştiyê dixwazin ji ber ku em dixwazin nasnameyên cuda li ser bingeha hemwelatîbûna wekhev bi hebûna xwe ya bêhempa, bi hev re bijîn.
Em aştiyê dixwazin ji ber ku em xizanî, bêkarî, kedxwariyê ya ku ji ber şer kûrtir kiriye qebûl nakin. Em aştiyê dixwazin ji ber ku em li dijî êrişên li ser jinan û mafên jinan ên bidesxistî têkoşînê dikin.
Em jiyaneke azadîxwaziya jinan diparêzin.
Em aştiyê dixwazin ji ber ku em politîkayên şer ên ku tundî û komkujiyên li dijî jinan kûrtir dikin, qebûl nakin.
Em aştiyê dixwazin ji ber ku em şerê sexlemparêziyê ku cureyeke tundiyê ye li dijî laş red dikin.
Em aştiyê dixwazin ji ber ku em dixwazin bi zimanê xwe yê dayikê bi çanda xwe , xwe bi xwe bi rê ve bibin.
Em aştiyê dixwazin ji ber ku em naxwazin ji ber şer war û jîngehên xwe biterîkînin.
Em aştiyê dixwazin ji ber ku em naxwazin çavkaniyên me li ser navê polîtîkayên ewlehiyê werin xerckirin.
Em aştiyê dixwazin ji ber ku em dixwazin zarok wekî kirdeyên civakî, bi azadî û bi ewlehî bijîn.
Em aştiyê dixwazin ji ber ku em dibêjin li dijî takesekperestiya kapîtalîst yekbûna bi civaka komunal re dê yekîtiya azad a gelan mîsoger bibe.
Em aştiyê dixwazin ji ber ku em talankirina xwezayê ya ji bo rantê red dikin.
Em aştiyê dixwazin ji ber ku em naxwazin ciwan bi fikrarên bêkarî, bêhêvîbûn an jî siberojê bitengijin.
Em qebûl nakin girtî bi awaekî derqanûnî werin darizandin û di girtîgehan de werin dîlgirtin.
Em aştiyê dixwazin ji ber ku em bawer dikin ku em ê Komara Demokratîk ava bikin.
Werin em bi hev re daxwaza ya aştiyê birûmet bilind bikin û jiyaneke azad û wekhev ava bikin.”
Îmze hatin avêtin
Daxuyanî bi berzkirina diruşmayên “Bijî Aşitî” û “Ji şer re na azadî aniha ” bi dawî bû. Girseya kombûyî piştî daxuyaniyê, ji bo kampanyayê îmze avêt û ji bo piştgiriya kampanyayê belavok belav kir.
