DEM Partî seba çareserîya meseleyê kurdî ê bi rê û rêbazanê demokratîk û aştîyane Amed de dest bi kampanyaya ‘Ma aştî wazenê, seba ke…’ kerd.
Partîya Demokrasî û Têduştî ya Şaran (DEM Partî) seba meseleyê kurdî bi rayîranê demokratîk û aştîyane bêro çareserkerdene, dest bi kampanyaya bi nameyê “Ma aştî wazenê, seba ke…” kerd. Kampanya Amed de bi eşkerayîyêk ameye destpêkerdene. Eşkerayî vernîya Ceylan Karavîl AVM de ameye dayene. Temsîlkarê partîyanê sîyasî û rêxistinanê komelanê sîvîlan paştî daye. Eşkerayî de pankartê “Ma aştî wazenê, seba ke ma awanbîyayîşê komara demokratîke ra bawer kenê” ame girewtene û sloganê “Bijî aştî / Biciwîyo aştî” ame vatene.
Hemsereka Komela Keyeyanê Girewteyan reyde Hetkarî (TUAY-DER) Yeter Erel Tuna eşkerayî de qisey kerd û vat: “Vengdayîşê birêz Abdullah Ocalanî ê 27ê sibate, xerîta yo. Şaran rê aştî û demokrasî lazim o. Ma ewro seba azadîya Abdullah Ocalanî na kampanya danê destpêkerdene. Ganî heqê hêvî yê Abdullah Ocalanî bêro caardene. Teqezkerdişê nê heqî tena teqezîyêka şexsî nîyo, teqezîya komelê demokratîkî yo.”
Hemserekê DEM Partî yê Amedî Abbas Şahîn zî vat: “Sîyasetê şerî; kedwerî, şîdet û qirkerdişî vera cinîyan gird kerd û rayîrê binkewtişêko hîra akerd. Ma mehkumê sîyasetê şer û tarîtîya şerî nîyê. Ma aştî wazenê. Vengdayîşê Aştî û Komelê Demokratîkî reyde hêvîya şaran a aştî pîlêr bîye. Nika zî seba demokrasî, têduştî û azadîye ma derûdorê vengdayîşî de yenê têhet. Ma komelêko heme şar û bawerî tede bi hewayêko azad ciwîyenê, pawenê. Ma aştî wazenê seba ke goreyê ma çareserîya demokratîk a meseleyê kurdî teqezkerdişê demokrasî, azadîye, têduştî û edaletî yo.”
Eşkerayî ra pey startê kampanyaya “Ma aştî wazenê, seba ke…” ame dayene.
