Kemal Boztaş, domantîya xo ra heta nika sey hunermendêk dar û beran ra erebeyanê tîtikan virazeno û roşeno. Seke vano westatî kalikê ey ra, pîyê ey ra ci rê menda û kes o bîn o ke naye ra dima nê karî bido ramitene çin o.
Kemal Boztaş, qezaya Gimgimî ya Mûşî de dewa Qurçike ra yo û emrê xo karê înşaatan de bi xebat vîyarnayo. Heto bîn ra zî domnatîya xo ra heta nika sey hunermendêk dar û beran ra erebeyanê tîtkinan virazeno û roşeno. Seke vano westatî kalikê ey ra, pîyê ey ra ci rê menda û kes o bîno ke naye ra dima nê karî bido ramitene çin o.
Ma seba nê kar û xebatanê balkêşan Kemal Boztaşî de qisey kerd. Emrê xo û karê xo ser o ma rê wina vano: “55 serrî yo ez qebe înşaat virazena. Domantîya xo ra na heta nika ez viraştena nê erebeyan ser o kar kena. Kalikê mi ra no kar ma rê mendo. Ey ra pey pîyê mi domna, nika zî ez kena. Ez vana qey o peyên zî ez a. Kalikê mi nê erebeyî viraştêne. Ey erebeyê pîlî viraştêne, wina qij nê.”
‘Kalikê mi Raîfo Boz westa bî’
Kemal Boztaş bingeyê westatîya xo kalikê xo ra gêno. Qale wina ano serê kalikê xo: “Na dewe de eke kesêk bivatêne ‘westa lazim o,’ vatêne ‘Raîfê Bozî bîyarê.’ Nameyê kalikê mi Raîf bî. Birayê ey Elî Boz pîya westa bîyê. Ez domanîya xo ra ey het de bîya. Meraqê min ê erebeyan 20-25 serrîya mi de bi. O wext mi Stenbol de viraştêne. Erebeyê mi Fransa, Almanya, Îngîlîstan şîyê. O wext ra yo ez nînan reyde xejilîyena. No hîna huzir dano mi.”
‘Yew ereba rojêka mi gêna’
Hunerê destê xo cuya wextê verênî ra girêdano û vatena xo wina qedîneno: “No kar kalikanê ma ra mendo. Nika ez qaytê ci kena kamcîn dewe de ereba est a? Çin a. Kamcîn dewe de cite est a? Çin a yanî. Nê hacetê susî yê. Yew ereba rojêka mi gêna. Hem birnayîşê ci, zimparayê ci, cîlaya cî. La ez gayan nêeşkena viraza. Ez înan yewna ca ra gêna. Ez sîparîş dana ê mi rê erşawenê.
Seba erebayanê mi nika zaf sîparişî nêyenê. Meraq zaf çin o. Stenbol de mi serrêk de 120 hebî erebeyî viraştê. Ez erşawena Stenbol, Mersîn, Îzmîr. Şonê teberê welatî zî. Ê cayan ra wazenê, ez zî virazena, înan rê erşawena.”
