Gimgim – Nobeta çadirî ke dewa Xarike ya Gimgimî de vera JESî ameybî dest pêkerdene, roja 21. de dewam kena. Nobedaran nerazîbîyayîşê xo yê vera JES’î îfade kerd û vat heta ke JES nêro betalkerdene tekoşînê înan do dewam bikero.
Nobeta çadirî ya ke dewa Xarike ya Gimgimî ya Mûşî de vera projeyê Santralê Enerjî yê Jeotermalî (JES) ameybî destpêkerdene, roja 21. de dewam kena. Nobete rê Meclîsê Ciwanan ê Platformê Ekolojî yê Gimgimî pêşengî keno. Cayê nobete de pankartê sey “Kedwerî meke, xoza xelas meke” û “No erd mîrasê baw û kalan o” , “aAmeyoxî pawenê” û “JES nêwazenîme” ameyê aliqnayene.
16 dewê ke do projeyê JES’î ra tesîrdar bibê, seba pawitişê xoza, xo rêxistin kerd û her roje 2 dewî seba 24 saetan nobete gênê. Kesê ke çalakîya nobete de yê dîyar kenê ke ê qerardar ê ke heta ke projeyê JES’î nêro betalkerdiş do çalakîya xo bidomnê. Nobedaran ra Gursel Taş û Alî Riza Vuralî ajansê ma rê qisey kerd.
‘Binê erdî ra bigîrê heta sêrê erdî, her ca talan kerdo’
Nobedaranê dewa Reqasan ra Gursel Taşî îfade kerd ke 3 aşmî yo seba JES’î tekoşîn danê û vat: “JESî anî tîya virazenî. Wa baş bizanê ke şarê ma sere ra heta nika senî wayîrê tîya vejîya ma zî nika ra pey wayîr vejîyenê. No sîstem wa baş bizano ke Amerîka nêyena tîya zengîn nêkena. Amerîka şêra ça, uca herimnayo. Nê sîstemî xora, nê welatî û Tirkîya herimnayo, roto. Bin erdî ra bigîrê heta sêrê erdî, her ca talan kerdo. Çîyanê nê tewiran ma bimirê zî ma qebul nêkenê. Ma ne welatê xo, koyanê xo, awa xo û heywananê xo nêverdanê. May û pîyê ma nê welatê ser o merdê. Ma zî do tîya de bimirî.”
‘Dewlete keyeyanê ma ser rijnena’
Gursel Taş veng da dewlete û vat: “Dewlet gere wayirê ma vejîya, la dewlete keyeyanê ma ma ser rijnena. Tîya awa ma kerde lêşin. Ma JESî qebul nêkenê. Însanê ma wa wayîrê xozayê xo vejîyê.”
Dewa Badan ra Alî Riza Vuralî zî qiseykerdişê xo de vat ke cayo ke do xebata JES’î bêra viraştiş, nêzdîyê dewa ma yo û wina domna: “Ma nêwazenê tîya de JES bêro viraştiş. Tîyade JES bêro viraştiş awa ma, hewayê ma benê lêşin. Aye ra zî cinî, merdim, doman, gencê ma peeyan nêwazenê. Ma tîya her roje di dewî nobete gênê. Na rey şîrketê pawitişê xoza yê mîyanneteweyî est o, weqif est o, nê welatê ma de zî, faalîyetê xo aver berdê, îmza kerdê. Na hereme, herêma Antolîya Rojhelatî zî herema pawitişê xoza ameyê îlankerdiş. Tîya de nebatê endemîkî zaf est ê. Aye ra zî ma JES nêwazenê.”
