Belgefîlmê “YÎBO” ke bale anceno asîmîlekerdişê gedeyanê kurdan ser o, do ewro Festîvala Belgefîlman ê FîlmaAmedî de bêro mojnayene. Rejîsora belgefîlmî Şukran Demîr dîyar kerd ke heta polîtîkayê asîmîlasyonî nêqedîyê do proses zî nêreso amancê xo.
Festîvala Belgefîlman a FîlmAmedî ya 9. emserr bi sloganê “Reh… Dorê adirî de rastîyê efsûnî…” yena kerdene. Festîvala ke ewro çar rojî yo yena kerdene, rastê eleqeyêka başe yena. Fîlmanê ke seba festîvale ameyê weçînitene, înan ra yew zî belgefîlmê “YÎBO” yo ke rejîsora ey Şukran Demîr û Ozgur Unalî kerda. Belgefîlmê YÎBO’yî do ewro saete 20:00î de Çand Amed de bêro mojnayene.
Rejîsora belgefîlmî Şukran Demîr derheqê tedeyîyayanê fîlm ûamancê viraştişê belgefîlmî de ajansê ma rê qisey kerd.
‘Mi vatêne ez o rojêk YÎBOyan ser o xebatêk bikera’
Şukran Demîr dîyar kerd ke a bi xo zî hîrê serrî YÎBO de wendo û wina vat: “Mi zî Colemêrg de YÎBO de wend. Her tim hişê mi de bi ke ez rojêk YÎBOyan ser o binusa yan zî xebatêk bikera. Seba ke demo ke mi wendêne zî mi zanayêne nê dibistanî senîn î û tede çi yeno kerdene. Serra 2022 de Hafiza Merkezî seba ciwanan projeyêk akerdbî û min û embazê xo Ozgur Unal ma muracat kerd, înan zî qebul kerd. Ma zî vat ma belgefilmêk virazê û kitabêk çap bikerê. Kitabê ma vejîya, nika Hafiza Merkezî de zî est o.”
‘Amancê perwerdeyîya dewlete teqez asîmîlasyon o’
Şukran Demîr wina behsê amancê viraştişê fîlmê xo kerd: “Çira YÎBO? Roja destpêkê Komara Tirkîya ra heta ewro hemverê kurdan polîtîkayê asîmîlasyonî yenê kerdene. No asîmîlasyon zî zafane dibistanan de yeno kerdene. Amancê perwerdeyo ke dibistanan de yeno dayene teqez asîmîlasyon o. Ez bi xo zî çîyê ke mi nê dibistanan de dîyê, ez zana ke no asîmîlasyon çîyêko şenik nîyo, zaf pîl o. Bi rayîrê gedeyan reseno keye û şarî. Nê semedî ra mi waşt biney behsê YÎBOyan bikera.”
‘Ziwan qedexe nêbo no proses eşkeno bireso amancê xo’
Şukran Demîr bale ant prosesê “Aştî û Komelê Demokratîk” ser o û nê çîyî vatî: “Ma serra 2025 de yê. La ma hema zî nêeşkenê serbest ziwanê xo de qisey bikerê. Nika prosesêk est o, eke no prosê aştî yo, a aştî zî do bi ziwanî bêra. Eke ziwan qedexe nêbo no proses zî do bireso amancê xo. Nê semedî ra roja ke mi dest bi fîlmî kerd heta ewro, hîrê serrî fîlm ser o xebitîyaya. Amancê ma o bi ke ma bale bianca ke gedeyê kurdan, dibistanan de, sûkan de, her tim her ca bi ziwan, kultur û hunerê bo biciwîyê. Nê semedî ra no mesele muhîm o.”
Şukran Demîr vengda şarê Amed û sînemahesan ke bêrê festîvale taqîb bikerê û qiseykerdişê xo bi nê vatişan qedîna: “Belgefîlmê mi ewro saete heşt de do bêro mojnayene. Ez wazena kesê ke eşkenê bêrê wa bêrê û ma na babete ser o qal bikerê. Ez do bi ameyîşê înan keyfweş biba.”
